- चेतन व्यास

वर्धा जिल्ह्यात तापमानाचा पारा उच्चांक गाठत आहे. गेल्या तीन दिवसांपासून तापमान 45 अंशाच्या घरात आहे. मंगळवारी तापमान 45.2 अंश इतके होते. वाढत्या तापमानाचा नागरिकांच्या आरोग्यावर परिणाम होताना दिसत आहे. वर्धा जिल्ह्यात बेशुद्धावस्थेत तिघांचा मृतदेह आढळला आहे. या तिघांचा उष्माघातामुळे मृत्यू झाल्याची शक्यता वर्तविण्यात येत आहे. शवविच्छेदन अहवाल आल्यानंतर तिघांच्या मृत्यूचे नेमके कारण समाेर येईलच परंतु नागरिकांनी काळजी घेणे गरजेचे बनले आहे.

वर्धा येथील स्टेशन फैल परिसरात मिलिंद रामदास सालोडकर (४५ रा. पळसगाव ता. देवळी) याचा मृतदेह आढळला. मिलिंदला दारू पिण्याचे व्यसन होते असे सांगितले जात आहे. तो नेहमीच दारु पिऊन पडल्याने जखमी व्हायचा.

मिलिंद हा मद्यधुंद अवस्थेत स्टेशनफैल परिसरात असलेल्या बुद्धविहाराच्यासमोर पडून होता. दिवसभर दारूच्या नशेत पडून असल्याने त्याला पाणी मिळाले नाही. त्यामुळे उष्माघाताने त्याचा मृत्यू झाल्याचा अंदाज शहर पोलिसांनी वर्तविला आहे. मिलिंद याचा आकस्मिक मृत्यूची नोंद करण्यात आली आहे.

दुसरी घटना आर्वी शहरात घडली. आंबेडकरनगर येथील रहिवासी देवराव तुकाराम मेश्राम (७०) हे टिनाच्या झोपडीत राहायचे. ते मृतावस्थेत राहत्या घरी आढळले. उष्माघातामुळे त्यांना चक्कर येऊन ते जमिनीवर पडल्याने त्यांचा मृत्यू झाला असल्याची नोंद आर्वी पोलिसांनी घेतली आहे.

तिसरी घटना वडनेर पोलिस ठाण्याच्या हद्दीत घडली. ६० वर्षीय वृद्ध निंबाच्या झाडाखाली निपचीत पडून असल्याचे दिसले. त्यांचा मृत्यू उष्पाघाताने झाल्याचा अंदाज वर्तविला असून याबाबतची नोंदही पोलिसांनी घेतली.

Edited By : Siddharth Latkar