• थायलंड जॉब स्कॅममध्ये ८०० भारतीय अडकल्याची धक्कादायक माहिती उघड

• महाराष्ट्रातील २५ तरुणांना गोल्डन ट्रँगल परिसरात ओलीस ठेवले

• तरुणांकडून १८-१९ तास काम करून घेतले जाते

• बंदुकीच्या धाकावर तरुणांचा छळ केला जातोय

योगेश काशिद, बीड

थायलंडमध्ये मोठ्या पगाराच्या नोकरीचं आमिष दाखवून महाराष्ट्रातील २५ तरुणांसह तब्बल ८०० भारतीयांना म्यानमार सीमेवर ओलीस ठेवल्याचा धक्कादायक प्रकार उघडकीस आला आहे. या तरुणांना बंदुकीच्या धाकावर १८-१८ तास सायबर फसवणुकीचं काम करण्यास भाग पाडलं जातं आहे. नकार दिल्यास त्यांना विजेचे शॉक आणि अमानुष मारहाण केली जात आहे. या आंतरराष्ट्रीय सायबर रॅकेटमधून तरुणांच्या सुटकेसाठी बीड पोलिसांनी थेट परराष्ट्र मंत्रालयाशी संपर्क साधला.

मिळालेल्या माहितीनुसार, चांगल्या पगाराच्या नोकरीचे आमिष दाखवून महाराष्ट्रातील २५ तरुणांना म्यानमार-थायलंड सीमेवरील कुख्यात 'गोल्डन ट्रँगल' परिसरात ओलिस ठेवल्याचा प्रकार समोर आला आहे. म्यानमार, थायलंड आणि लाओस या देशांच्या सीमा जिथे मिळतात त्या भागाला आंतरराष्ट्रीय स्तरावर 'गोल्डन ट्रँगल' म्हटले जाते. बीडमधील एका तरुणाच्या धक्कादायक फोनमुळे मानवी तस्करी आणि सायबर फसवणुकीच्या आंतरराष्ट्रीय रॅकेटचा पर्दाफाश झाला आहे.

पीडित तरुणांच्या माहितीनुसार, बंदुकीच्या धाकावर त्यांच्याकडून दिवसाचे १८ ते १९ तास ऑनलाइन फसवणुकीचे काम करून घेतले जात आहे. काम करण्यास नकार दिल्यास मारहाण, विजेचे शॉक आणि अमानुष छळ केला जात असल्याचे गंभीर आरोप त्यांनी केले आहेत. या प्रकरणी बीड सायबर पोलिसांनी गुन्हा दाखल करत तातडीने परराष्ट्र मंत्रालयाशी संपर्क साधला आहे. अडकलेल्या सर्व तरुणांच्या सुरक्षित सुटकेसाठी राज्य आणि केंद्र सरकारच्या पातळीवर युद्धपातळीवर प्रयत्न सुरू आहेत.