Shocking : बीड हादरलं! दळण आणायला गेलेल्या मुलीला तरुणाने रस्त्यात गाठलं; जबरदस्ती करत घरात नेलं अन्..

Maharashtra Beed Rape Case News बीडमधून धक्कादायक बातमी समोर आली आहे. अंबाजोगाई तालुक्यातील एका १६ वर्षीय अल्पवयीन मुलीला जबरदस्ती मारहाण करून तिच्यावर बलात्कार करण्यात आला आहे. याप्रकरणी पोलीस ठाण्यात गुन्हा दाखल करण्यात आला असून पोलिसांनी घटनेचं गांभीर्य लक्षात घेऊन तातडीने तपास सुरु केला आहे. दरम्यान या घटनेने मुलींच्या सुरक्षिततेवर प्रश्नचिन्ह उपस्थित केले जात आहे.

मिळालेल्या माहितीनुसार, पीडित मुलगी घरातील दळण आणण्यासाठी गावातील पिठाच्या गिरणीकडे पायी जात होती. यावेळी आरोपी रमेश्वर बंडे याने तिचा रस्ता अडवला. त्यानंतर तिला जबरदस्तीने जवळील एका घरात नेल्याचा आरोप आहे. मुलीने विरोध करण्याचा प्रयत्न केला असता आरोपीने तिला मारहाण करून धमकावले. भीतीचे वातावरण निर्माण करत तिच्यावर दोन वेळा लैंगिक अत्याचार केल्याचे तक्रारीत नमूद करण्यात आले आहे.

घटनेनंतर घाबरलेल्या अवस्थेत पीडिता कशीबशी तेथून बाहेर पडली आणि घरी पोहोचली. तिने संपूर्ण घडलेला प्रकार आपल्या कुटुंबीयांना सांगितल्यानंतर नातेवाईकांनी तीव्र संताप व्यक्त केला. त्यानंतर त्यांनी तत्काळ अंबाजोगाई ग्रामीण पोलीस ठाणे गाठून आरोपीविरुद्ध कठोर कारवाईची मागणी केली.

पोलिसांनी पीडित मुलीचा जबाब नोंदवून तिची वैद्यकीय तपासणी केली. प्राथमिक चौकशी आणि उपलब्ध माहितीच्या आधारे आरोपी रमेश्वर बंडे याच्याविरुद्ध बाल लैंगिक अत्याचार प्रतिबंधक कायदा (पोक्सो) तसेच अनुसूचित जाती-जमाती अत्याचार प्रतिबंधक कायद्यांतर्गत गुन्हा दाखल करण्यात आला आहे.