शासनाच्या कॉपीमुक्त अभियानाचा कसा फज्जा उडाला हे साम टीव्हीनं दहावीच्या पहिल्याच पेपरला दाखवलं होतं. जालन्यातील बदनापूरमध्ये मराठीचा पेपर सुरू असतानाच प्रश्नपत्रिका आणि त्याची उत्तर लिहून झेरॉक्स सेंटरवर विकल्या जात असल्याचा साम टीव्हीन पर्दाफाश केल्यानंतर राज्यात खळबळ उडाली होती.

आता अहिल्यानगरमधला गंभीर प्रकार समोर आलाय. बारावीचा गुरुवारी बायलॉजीचा शेवटचा पेपर होता. यावेळी मुलाला कॉपी पुरवण्यासाठी चक्क नायब तहसिलदार शाळेत आले होते. आपला मुलगा पास व्हावा या काळजीनं धाव घेणाऱ्या या बापाचं नाव आहे अनिल तोरडमल. पण नशिबानं त्यांना साथ दिली नाही. भरारी पथकाच्या तावडीत ते सापडले. पाथर्डी तालुक्यातील तनपूरवाडी परीक्षा केंद्रावरील हा धक्कादायक प्रकार आहे.

जिल्हाधिकाऱ्यांनी फौजदारी गुन्हा दाखल करण्याचे आदेश दिलेत. घटनेची माहिती मिळताच पोलीस घटनास्थळी दाखल झाले होते. चक्क नायब तहसिलदाराविरोधातच कारवाई झाल्यानं खळबळ उडाली आहे. अनेक वर्षांपासून किडलेल्या व्यवस्थेत एखाद- दोन प्रकार घडू शकतात. मात्र पुढच्या वर्षी तेही दोष दूर होतील, असा विश्वास पालकमंत्र्यांनी व्यक्त केला आहे.

यापूर्वी यवतमाळच्या महागावमध्ये केंद्र संचालकांनीच पेपर फोडल्याची बाब चौकशीतून समोर आलीय. तर संभाजीनगर जिल्ह्यातील फुलंब्रीत मास कॉपीचा प्रकार समोर आला होता. जिल्हा परीषदेच्या सीईओंच्या पाहणी दौऱ्यात चक्क शिक्षकांनीच कॉपी पुरवल्याचं समोर आलं होतं. आता अहिल्यानगरमध्ये प्रशासनातील अधिकारीच कॉपी पुरवण्यात पुढाकार घेत असतील तर कॉपीमुक्त अभियानाचे तीन तेरा वाजणारच. शासन यापुढे काय कडक पाऊल उचलणार? याकडे सगळ्याचं लक्ष आहे.