रायगडच्या म्हसळा येथील मेंदडी येथून माणुसकीच्या नात्याला काळिमा फासणारी घटना समोर आली आहे. पोटच्या मुलांनी आपल्या आई वडिलांची निर्घृण हत्या केली आहे. घर खर्च देत नाही, तसेच घरी राहू देत नाही म्हणून दोन मुलांनी आई वडिलांचा जीव घेतला. या प्रकरणाची माहिती पोलिसांना मिळताच त्यांनी तपासाला सुरूवात केली. तसेच दोन मुलांविरोधात गुन्हा दाखल केला. सध्या पोलिसांकडून तपास सुरू आहे.

महादेव कांबळे आणि विठाबाई कांबळे असे मृत दांपत्याचे नाव आहे. हे दांपत्या आपल्या मुलांसोबत म्हसळा येथील मेंदडी गावात वास्तव्यास होते. दोन दिवसांपूर्वी दोघांचा मृतदेह राहत्या घरात सापडला. या प्रकरणाची माहिती मिळताच म्हसळा पोलिस आणि स्थानिक गुन्हे शाखेने घटनास्थळी धाव घेतली. तसेच तपासाला सुरूवात केली.

पोलिसांनी अवघ्या २४ तासांत तपास करीत हत्येचा छडा लावला. पोलीस तपासात धक्कादायक माहिती समोर आली आहे. वृद्ध दांपत्याच्या दोन मुलांनीच आपल्या आई वडिलांचा खून केल्याचं समोर आलं. नरेश कांबळे आणि चंद्रकांत कांबळे अशी दोन आरोपींची नावे आहेत. आई वडील आपल्याला घरखर्च देत नाहीत, तसेच घरात राहू देत नाहीत, याच गोष्टीचा राग दोन्ही मुलांच्या मनात होता.

दोन्ही मुलांनी आई वडिलांनी ठार मारण्याचा निर्णय घेतला. दोघांनी मिळून आई वडिलांची हत्या केली. ही बाब पोलीस तपासातून समोर आली. या प्रकरणी पोलिसांनी अधिक तपास करून आरोपी नरेश कांबळे आणि चंद्रकांत कांबळेला अटक केली आहे. या घटनेनंतर म्हसळा गावात खळबळ उडाली असून, पुढील तपाल पोलिसांकडून सुरू आहे.