shivshahi bus accident in Beed Parli road : बीडहून नांदेडकडे जाणाऱ्या शिवशाही बस आणि रिक्षा यांच्यात परळी तालुक्यातील पांगरी गावाजवळ भीषण अपघात झाला. या अपघातात रिक्षाचालक श्रीनिवास राठोड यांचा जागीच मृत्यू झाला. यामुळे संतप्त जमावाने शिवशाही बसवर दगडफेक केली. अपघातानंतर परिसरात तणाव निर्माण झाला आणि सुमारे दीड तास वाहतूक ठप्प झाली. स्थानिकांनी तात्काळ या प्रकरणी पोलिसांना पाचारण केले.

पोलिसांनी दिलेल्या माहितीनुसार, रिक्षाचालक श्रीनिवास राठोड हे शेतात मजूर महिलांना सोडून परळीकडे परतत होते. पांगरी कॅम्पजवळ शिवशाही बसने रिक्षाला जोरदार धडक दिली. अपघात इतका भीषण होता की, रिक्षा पूर्णपणे चक्काचूर झाली आणि चालकाचा जागीच मृत्यू झाला. घटनेची माहिती समजताच स्थानिकांनी संतप्त होऊन बसवर दगडफेक केली. त्यामुळे महामार्गावरील परिस्थिती चिघळली.

घटनास्थळी परळी ग्रामीण पोलीस ठाण्याचे कर्मचारी तातडीने दाखल झाले. त्यांनी जमावाला शांत करून वाहतूक सुरळीत केली. अपघाताचे कारण अद्याप स्पष्ट झालेले नाही. पोलिसांनी घटनेचा पंचनामा करून तपास सुरू केला आहे. या अपघातामुळे परिसरात शोककळा पसरली असून रिक्षाचालकाच्या कुटुंबीयांवर दुखाचा डोंगर कोसळला आहे. पोलिसांनी नागरिकांना शांत करत वाहतूक सुरळीत केली. पोलिसाकडून या प्रकरणाचा तपास केला जात आहे.