सचिन कदम, साम टीव्ही

बीड जिल्ह्यातील मस्साजोगचे दिवंगत सरपंच संतोष देशमुख यांच्या निर्घृण हत्येच्या जखमा अजूनही राज्यातील जनतेच्या मनात ताज्या आहेत. अशातच रायगड जिल्ह्यात देशमुख हत्याकांडासारख्या प्रकाराची पुनरावृत्ती होण्याची भीती व्यक्त केली जात आहे. याला कारणही तसेच धक्कादायक आहे. दिवेआगर ग्रामपंचायतीचे सरपंच सिद्धेश कोसबे यांनी जीवे मारण्याची धमकी देण्यात आली आहे. ही धमकी अनधिकृत बांधकामाविरोधात कारवाई केल्यामुळे ठार मारण्याची धमकी देण्यात आली आहे. या धमकीमुळे दिवेआगर गावात खळबळ उडाली आहे.

दिवेआगर समुद्रकिनाऱ्यालगतच्या शासकीय जागेवर चोगले कुटुंबाचे अनधिकृत घर आहे. हे अनधिकृत घर बांधल्याची तक्रार ग्रामपंचायतीकडे दाखल झाली होती. या तक्रारीची दखल घेत सरपंच कोसबे यांनी संबधितांना नोटीस पाठवली. नोटीस बजावल्यानंतर कोसबे कुटुंबासह सरपंचांना जीवे मारण्याची धमकी देण्यात आली.

या घटनेनंतर कोसबे कुटुंब आणि सरपंचांनी पोलीस ठाण्यात धाव घेतली. तसेच पोलिसांत तक्रार दाखल केली. मात्र, या प्रकरणाकडे पोलीस दुर्लक्ष करत असल्याचा आरोप सरपंच कोसबे यांनी केला आहे. 'आमचंही संतोष देशमुखासारखं काहीतरी होईपर्यंत वाट पाहताय का?' असा थेट सवाल त्यांनी प्रशासन आणि पोलिसांसमोर उपस्थित केला आहे.

निसर्गरम्‍य कोकणातील किनारपट्टीवरील मोक्‍याच्‍या जागांवर धनदांडग्‍यांचा डोळा आहे. त्‍या बळकावण्‍यासाठी स्‍थानिकांना हाताशी धरून दादागिरी केली जात असल्याचे ग्रामस्‍थांचे म्‍हणणे आहे.