विनोद जिरे, बीड

बीडच्या मस्साजोगचे सरपंच संतोष देशमूख हत्या प्रकरण आणि खंडणी प्रकरणातील आरोपी वाल्मीक कराडकडून ३ मोबाईल जप्त करण्यात आले आहेत. यातील एक सिमकार्ड हे परदेशात रजिस्टर केलेले असल्याची माहिती समोर आली आहे. यामुळेच वाल्मीक कराडची परदेशात संपत्ती असल्याचा संशय सीआयडीला असून आता त्या दिशेने सीआयडीने तपास सुरू केला आहे.

खंडणी प्रकरणातील आरोपी वाल्मीक कराडवर मोक्का अंतर्गत कारवाई केल्यानंतर बीडच्या न्यायालयात हजर करण्यात आले होते. त्या ठिकाणी जवळपास दीड तास युक्तीवाद झाला. या युक्तीवादादरम्यान सीआयडीने आरोपीची देशात तसेच परदेशात संपत्ती असून त्याचा शोध घ्यायचा असल्याचे सीआयडीने म्हटले होते.

सीआयडीच्या तपासातून एक खळबळजनक माहिती समोर आली आहे. वाल्मीक कराडकडून जप्त केलेल्या ३ मोबाईलपैकी एक मोबाईलधील सिमकार्ड हे परदेशात रजिस्टर केलेले आहे. त्यामुळे वाल्मीक कराडची परेदशात संपत्ती असल्याबाबतचा संशय बळावला आहे. आता सीआयडी या दिशेने तपास सुरु आहे.

दरम्यान वाल्मीक कराडला खंडणी प्रकरणात न्यायालयीन कोठडी मिळाल्यानंतर त्यांच्या वकीलाकडून जामीन अर्ज दाखल करण्यात आला होता. त्यानंतर आता सीआयडीने या जामीन अर्जावर आक्षेप नोंदवला असून वाल्मीक कराडला जामीन मिळाला तर पुराव्यामध्ये छेडछाड होऊ शकतो? असा आक्षेप नोंदवत जामीन न देण्याची विनंती सीआयडीने न्यायालयाकडे केली आहे.