सांगली जिल्हा मध्यवर्ती बँकेमध्ये नोकर भरतीला सहकार आयुक्तांनी परवानगी दिलेली आहे. पूर्वीच्या नोकर भरतीमध्ये मोठ्या प्रमाणामध्ये भ्रष्टाचार झाल्याचे आढळले होते. त्या संदर्भामध्ये चौकशी पूर्ण झालेली आहे. या बँकेची चौकशी प्रलंबित असताना नव्यानं ५५९ जागांच्या नोकर भरती करायला परवानगी दिलेली आहे. या भरतीवरून सदाभाऊ खोत यांनी उपोषणाचा इशारा दिला असून "पुढार्‍यांना पैसे खाऊन जवळचे बगलबच्चे बँकेमध्ये भरण्यापेक्षा कर्तबगार लेकरं बँकेमध्येघ्या" असे वक्तव्य आमदार सदाभाऊ खोत यांनी पत्रकार परिषदेत केले आहे.

या भरतीवरून आमदार सदाभाऊ खोत यांनी आपल्याच सरकारमधील सहकार मंत्र्यांवर गंभीर आरोप केला आहे. सदाभाऊ खोत यांनी सहकार मंत्र्यांनाच घेरताना एका जागेसाठी तब्बल ३० लाख रुपये दर ठरवला गेल्याचा आरोप केला आहे. सदाभाऊ यांनी सांगली जिल्हा बँकेतील नोकरभरतीला विरोध केला असून एमपीएससीच्या धर्तीवर परीक्षा घेऊन भरती करा, अशी मागणी केली.

सदाभाऊ खोत म्हणाले की, सहकार मंत्री राष्ट्रवादीतूनच असल्यामुळे त्यांना त्यांचा गोतावळा सांभाळायचा आहे.चांगली शिकलेली अभ्यासू मुलं बँकेमध्ये येणं अत्यंत गरजेचं आहे. आणि कोट्यावधी रुपयांचा मलिदा लाटण्यासाठी बँकेची चौकशी सुरू असताना या ठिकाणी नोकरभरतीला परवानगी दिलेली आहे. हे निश्चितपणाने हे अयोग्य आहे.जर आहे असंच घोडा दमटून नेण्याचा प्रयत्न केला तर राज्याच्या सहकार मंत्र्याच्या मुंबईतल्या बंगल्यासमोर मी स्वतः उपोषण करणार असल्याचं सदाभाऊ खोत यांनी म्हटलं.

नोकर भरतीच्या निर्णयावर पुढे बोलताना खोत म्हणाले, "राज्याच्या तरुणाला नोकरीची संधी निश्चितपणाने मिळाली पाहिजे. पुढार्‍यांना पैसे खाऊन जवळचे बगलबच्चे बँकेमध्ये भरण्यापेक्षा कर्तबगार लेकरं बँकेमध्ये जाणं गरजेचं आहे. ही भूमिका आमची आहे." असे सदाभाऊ खोत यांनी व्यक्त केले आहे.