अहिल्यानगरात सहावीतल्या चिमुकल्या मुलीवरील अॅसिड हल्ल्याच्या घटनेनं महाराष्ट्राला लाज तर आणलीच. मात्र प्रत्येक मुलीच्या आई-वडिलांना या घटनेनं हादरवलंय..मात्र २४ तासांपेक्षा जास्त काळ उलटूनही आरोपी मोकाट असून त्याचा कोणताही सुगावा लागलेला नाही. त्यामुळेच नागरिकांमध्ये संतापाची लाट पसरली असून आरोपीच्या अटकेसाठी थेट रास्ता रोकोच करण्यात आला.

ज्या ठिकाणी मुलीवर अॅसिड हल्ला झाला. तिथे सीसीटीव्ही नसल्याचं उघ़ड झालंय. त्यामुळे मुलींची सुरक्षा वाऱ्यावर असल्याची टीका युवक काँग्रेसच्या नेत्या जयश्री थोरात यांनी केलीय. दुसरीकडे विधिमंडळातही अॅसिड हल्ल्याचे पडसाद उमटले. विधानपरिषदेच्या उपसभापती डॉ. नीलम गोऱ्हे यांनी अॅसिड हल्ल्यातील गुन्हेगारांसाठी वेगळा कायदा हवा, अशी संतप्त भावना व्यक्त केलीय. तर आरोपीला अॅसिड पुरवणाऱ्यांवरही कारवाई होणार असल्याचं गृहराज्यमंत्र्यांनी स्पष्ट केलयं.

एकीकडे राज्यात महिलांच्या सबलीकरणासाठी अनेक योजना राबवल्या जातायत. मात्र दुसरीकडे सहावीत शिकणारी एक चिमुकली सुरक्षितपणे घरी जाऊ शकत नसल्याचं महाराष्ट्राला लाज आणणारं धक्कादायक वास्तव या घटनेमुळे समोर आलंय. गुन्हेगारांमध्ये पोलिसांची जरब कमी झालीय का? सध्याच्या कायद्याचा धाक संपलाय का? असे अनेक प्रश्न यानिमित्तानं उपस्थित झाले आहेत. त्यामुळे महिलांच्या सुरक्षेसाठी स्वतंत्र कायदा होणार का? याची आता चर्चा सुरू झालीय.