• संभाजीनगरच्या वाळूजमध्ये दोन गटात तुफान हाणामारी

• जुन्या वादातून लाथाबुक्क्या आणि दांडक्याने मारहाण

• महिलांनाही मारहाण केल्याचा आरोप

• ही घटना सीसीटीव्हीत कैद झाली

माधव सावरगावे, संभाजीनगर

छत्रपती संभाजीनगरमध्ये दोन गटामध्ये तुफान हाणामारी झाल्याची घटना समोर आली आहे. जुन्या वादातून दोन गट आमनेसामने आले. छत्रपती संभाजीनगर जिल्ह्यातील वाळूज परिसरात ही घटना घडली. या मारहाणीचा व्हिडिओ सोशल मीडियावर व्हायरल झालाय. या घटनेचा व्हिडीओ व्हायरल झाल्यानंतर पोलिसांनी सायंकाळी गुन्हा दाखल करत तपास सुरू केला.

याप्रकरणी दुर्गा संजय पांढरे (वय ५०, रा. बकवालनगर, दत्तमंदिराजवळ, वाळूज) यांनी वाळूज पोलिस ठाण्यात फिर्याद दिली आहे. फिर्यादीनुसार, बुधवारी सकाळी साडेदहा वाजेच्या सुमारास त्यांच्या जनरल स्टोअर्स दुकानासमोर त्यांचा पुतण्या महेश अनिल पांढरे उभा असताना ज्ञानेश्वर वनारसे, सपना वनारसे, गौरी वनारसे आणि कार्तिक वनारसे यांनी जुन्या भांडणाच्या कारणावरून शिवीगाळ करण्यास सुरुवात केली.

वाद वाढल्यानंतर आरोपींनी महेश पांढरेला हाताने मारहाण केली. त्यावेळी भांडण सोडवण्यासाठी गेलेल्या संजय पांढरे यांच्यावर कार्तिक वनारसेने लाकडी दांड्याने पोटावर आणि पाठीवर वार केल्याचे फिर्यादीत नमूद करण्यात आले आहे. दुर्गा पांढरे यांनाही दांड्याने मारहाण करण्यात आली. तसेच महेश पांढरे यालाही लाकडी दांड्याने मारून जखमी करण्यात आल्याचा आरोप करण्यात आला आहे.वाळूजमध्ये दोन गटात तुफान हाणामारी

1. संभाजीनगर व्हायरल मारहाणीचा व्हिडिओ

2. जुन्या वादातून दांडक्याने मारहाण

3. महिलांनाही मारहाण केल्याचा आरोप

मारहाणीनंतर संबंधितांनी वाळूज पोलिस ठाणे गाठले. पोलिसांनी वैद्यकीय तपासणीसाठी घाटी रुग्णालयात पाठविल्यानंतर उपचार घेऊन त्यांनी पुन्हा पोलीस ठाण्यात तक्रार दाखल केली. दरम्यान, दोन गटांत झालेल्या हाणामारीचा व्हिडिओ सोशल मीडियावर मोठ्या प्रमाणात व्हायरल झाला होता. या प्रकरणाची गंभीर दखल घेत वाळूज पोलिसांनी सायंकाळी गुन्हा दाखल करून पुढील तपास सुरू केला आहे.