दिलीप कांबळे, साम प्रतिनिधी

मावळ तालुक्यात प्रस्तावित रिंग रोड प्रकल्पावरून शेतकऱ्यांचा संताप उफाळून आला आहे. सांगवडे, दारुंबरे, साळुंबरेसह अनेक गावांतील शेतकऱ्यांनी एकमुखाने रिंग रोडला तीव्र विरोध दर्शविला असून, “जीव गेला तरी चालेल पण एक इंचही जमीन देणार नाही” असा इशारा सरकारला दिला आहे. याआधी पवना धरण, मुंबई–पुणे द्रुतगती महामार्गामुळे अल्पभूधारक झालेल्या शेतकऱ्यांच्या मते, आता पुन्हा सुपीक जमिनी संपादित झाल्यास पुढच्या पिढीच्या उदरनिर्वाहाचा प्रश्न निर्माण होईल.

मावळ तालुक्यातील जांबे येथून रिंग रोडला सुरुवात होणार असून मावळ तालुक्यातील सांगवडे, दारुंबरे, साळुंबरे, यासह अनेक गावे या रिंग रोड मुळे बाधित होणार आहेत. त्यामुळे या रिंग रोडला स्थानिक शेतकऱ्यांचा तीव्र विरोध दर्शविला आहे. याआधीच मावळतील शेतकऱ्यांनी मुंबई पुणे द्रुतगती महामार्ग, पवना धरण याला जमिनी दिल्या त्यामुळे हे शेतकरी अल्पभूधारक झाले आहेत. आत्ता सरकारने रिंग रोड तयार करण्याचा घाट धरलेले आहे. मात्र या रिंग रोड साठी आमचा जीव गेला तरी चालेल पण एकही इंच जमीन आम्ही रिंग रोडला देणार नाही, असा पवित्रा घेतलाय.

याआधी याभागात झालेल्या पवना धरणावेळी अनेक शेतकऱ्यांना त्याचा परतावा मिळालेला नाहीये. हे उदाहरण ताजे असताना सरकार रिंग रोडचा प्रकल्प राबवणार आहे. त्यामुळे शेतकरी खूप आक्रमक झाले आहेत. पवना धरण तयार करीत असताना अनेक शेतकऱ्यांच्या जमिनी गेल्या मात्र त्याचाही परतावा मिळाला नाही. ही बाब लक्षात घेता हा रिंग रोड त्वरित रद्द करावा अन्यथा रस्त्यावर उतरून आंदोलन करावे लागेल. त्यावेळी आंदोलन करीत असताना तीन शेतकऱ्यांचा बळी या राज्य सरकारने घेतला होता. खबरदार जर आमच्या जमिनीला हात लावाल तर, असा इशारा शेतकऱ्यांनी दिलाय.

आम्ही आता अल्पभूधारक आहोत आणि त्यातही आमची ही जमीन जर सरकारने घेतली तर पुढच्या पिढीचं काय करायचं? असा सवाल बाधित शेतकऱ्यांनी सरकारला विचारला आहे. बिल्डर आणि राज्य सरकार यांची मिलीभगत आहे. 90 मीटरच्या या रस्त्यामुळे सुपीक बागायती शेत जमीन तसेच अल्पभूधारकांच्या जमिनी संपादित करण्यात येणार आहेत. त्यामुळे पुन्हा शेतकऱ्यांच्या उपजीविकेजवर गदा येणार आहे, असे मत शेतकऱ्यांनी व्यक्त केली आहे. दरम्यान आज मावळच्या सांगवडे येथे बाधित शेतकऱ्यांनी बैठक घेऊन एक मुखाने या रिंग रोडला विरोध दर्शविला आहे.