Maharashtra Kesari Shivraj Rakshe : 14 जानेवारी रोजी पुण्यात महाराष्ट्र केसरी स्पर्धेचा थरार रंगला. महाराष्ट्र केसरीच्या अंतिम लढतीत शिवराज राक्षेने महेंद्र गायकवाडला पराभूत केले. शिवराज राक्षे महाराष्ट्र केसरी ठरताच त्याच्या गावी ग्रामस्थांनी जल्लोष केला. त्यावेळी शिवराजच्या कुटुंबीतील सदस्यांच्या डोळ्यातून आनंदाश्रू तरळले. 

आज महाराष्ट्र केसरी (Maharashtra Kesari) विजता पैलवान शिवराज राक्षे राजगुरुनगर येथील राक्षेवाडी या मुळगावी दाखल झाला. यावेळी कुटुंबियांसह खासदार अमोल कोल्हेंनी (Amol Kolhe) शिवराजचे स्वागत केले. यावेळी शिवराजने राज्य सरकारने आता तरी नोकरीची संधी द्यावी अशी मागणी केली.

शिवराज म्हणाला की, महाराष्ट्र केसरी हे माझ्यासाठी आईवडिलांचे स्वप्न होतं. मात्र, अडचणींचा डोंगर समोर होता आणि त्यातुनही कुटुंबाने साथ दिली. महाराष्ट्र केसरीची गदा घेऊन यायचे असा मनापासून निश्चय केला होताच अशी भावना शिवराजने व्यक्त केली.

मागच्या वर्षी राज्याला गोल्ड मेडल मिळवून दिलं. मात्र त्यावेळी मला नोकरी मिळाली नसल्याची खंत महाराष्ट्र केसरी शिवराज राक्षेने व्यक्त करत आता सरकारी नोकरीची संधी द्यावी अशी आपेक्षा व्यक्त केली,

यावेळी खासदार कोल्हेंनी राज्यातील क्रिडा धोरणात खेडाळुंना प्रोत्साहन देण्यासाठी आर्थिक धोरण उभं करण्याची गरज असून शिवराजच्या नोकरीचा प्रश्न मार्गी लावणार असल्याचा शब्द दिला.