देशात पुन्हा एकदा कोरोनाने डोकं वर काढले आहे. कोरोना रुग्णांची संख्या दिवसेंदिवस वाढत चालली आहे. कोरोनाच्या रुग्णांचा मृत्यू देखील होताना दिसत आहेत. महाराष्ट्रातील काही जिल्ह्यांमध्ये कोरोनाचे रुग्ण आढळत आहेत. मुंबई, ठाणेपाठोपाठ आता नागपूरमध्ये कोरोनाने टेन्शन वाढवले आहे. आणखी दोन कोरोना रुग्णांचा उपचारादरम्यान मृत्यू झाला आहे.

मिळालेल्या माहितीनुसार, नागपुरात कोरोनाने दोघांचा मृत्यू झाला. कोरोना रुग्णांच्या मृतांचा आकडा सातवर पोहचला आहे. नागपुरात एका ६४ वर्षीय वृद्धाचा कोरोनाने मृत्यू झाला. तर कोरोनामुळे मृत्यू झालेला दुसरा रुग्ण भंडारा जिल्ह्यातील असून त्याचे वय ५९ वर्षे होते. तर राज्यातील मुंबई, ठाणे, पुणे, सातारा, कोल्हापूर, सांगली आणि संभाजीनगर या ठिकाणी आतापर्यंत कोरोनाचे रुग्ण आढळले आहेत.

नागपूर शहरातील विविध रुग्णालयामध्ये आतापर्यंत ६० पेक्षा अधिक कोरोना रुग्णांची नोंद करण्यात आली आहे. त्यापैकी २० जण सक्रिय आहेत. तर बहुतांश कोरोना रुग्ण होम आयसोलेशनमध्ये आहे. पाच रुग्णांवर वेगवेगळ्या खासगी रुग्णालयात उपचार सुरू आहे. नागपूरमध्ये कोरोना रुग्णांची वाढती संख्या लक्षात घेता प्रशासनाकडून उपाययोजना केल्या जात आहेत.

राज्यात कोरोना रुग्णांची संख्या वाढत आहे. या कोरोना रुग्णांमध्ये सौम्य लक्षणे आढळून येत आहेत. सार्वजनिक आरोग्य विभागातर्फे कोरोनाची तपासणी आणि उपचाराची सोय करण्यात आली आहे. त्यामुळे कोरोनाला घाबरून न जाता वेळीच योग्य उपचार करा असे आवाहन प्रशासनाकडून केले जात आहे.