पराग ढोबळे, नागपूर |ता. १३ जून २०२४

मध्यरात्री पब्जी खेळताना अंबाझरी तलावाच्या पंप हाऊसच्या खड्ड्यात पडून बर्थडे बॉयचा मृत्यू झाल्याची दुर्दैवी घटना नागपुरमध्ये घडली. पुलकित शहदादपुरी असे या तरुणाचे नाव असून तो वाढदिवसाची पार्टी देण्यासाठी घराबाहेर पडला होता. या मन सुन्न करणाऱ्या घटनेने सर्वत्र हळहळ व्यक्त होत आहे.

याबाबत सविस्तर माहिती अशी की, पुलकित शहदादपुरी (वय, १६) इयत्ता अकरावीत शिकत होता. ११ जून रोजी त्याचा वाढदिवस होता. रात्री कुटुंबियांसोबत वाढदिवस साजरा केल्यानंतर तो आपल्या मित्राला पार्टी देण्यासाठी बाहेर पडला. मात्र सकाळी लवकर दुकाने बंद असल्याने तो आणि त्याचा मित्र अंबाझरी तलावावर पंप हाऊसजवळ जाऊन पब्जी खेळत बसले.

पहाटे 4 वाजताच्या सुमारास दुकाने उघडले असतील म्हणून ते जाण्यासाठी निघाले. मात्र रात्रीच्या अंधारात पात्रात असलेल्या खोल खड्डा लक्षात आला नाही, ज्यामुळे तोल जाऊन पुलकित त्यामध्ये पडला. मित्राने आवाज देऊनही पुलकितने प्रतिसाद न दिल्याने घाबरुन त्याने त्याच्या कुटुंबियांना फोन करुन माहिती दिली.

दरम्यान, याबाबतची माहिती मिळताच कुटुंबियांनी पोलिसांना कळवले तसेच घटनास्थळी धाव घेतली. शोध पथकाच्या मदतीने पुलकीतचा मृतदेह बाहेर काढण्यात आला. शवविच्छेदनानंतर त्याचे पार्थिव कुटुंबियांना देण्यात आले. वाढदिवसादिनीच मुलावर काळा घातल्याने आई- वडिलांवर दुःखाचा डोंगर कोसळला आहे.