Shocking : रात्रभर नवऱ्यासोबत भांडली, रागात ५ महिन्यांच्या मुलाचं डोकं फरशीने ठेचलं; जन्मदात्या आईने केली पोटच्या लेकाची हत्या

Uttar Pradesh Prayagraj 5 Month Old Boy Murder By Mother उत्तर प्रदेशातील प्रयागराज जिल्ह्यातून एक संतापजनक घटना समोर आली आहे. एका क्रूर आईने तिच्या ५ महिन्यांच्या मुलाची निर्घृण हत्या केली. धक्कादायक म्हणजे पतीसोबत झालेल्या वादातून संतापून महिलेने हे कृत्य केल्याचे उघड झाले आहे. याप्रकरणी महिलेवर गुन्हा दाखल करण्यात आला असून पुढील कारवाई सुरूर आहे.

मिळालेल्या माहितीनुसार, सदर घटना उत्तर प्रदेशातील प्रयागराज येथे बुधवारी घडली आहे. आरोपी महिला मनोरमा यादव आणि तिचा नवरा संतोष यादव यांच्यामध्ये वारंवार छोट्या छोट्या कारणांवरून खटके उडत होते. पाच महिन्यांपूर्वीच मनोरमाने एका गोंडस मुलाला जन्म दिला. ११ मार्च रोजी बुधवारी रात्री पुन्हा या दोघांमध्ये शुल्लक कारणावरून वाद झाला. नवऱ्यासोबत झालेला हा वाद मनोरमाच्या इतका जिव्हारी लागला की, तिने त्याचा राग आपल्या पाच महिन्यांच्या मुलावर काढला.

तिने घरातील फरशीच्या तुकड्याने बाळाच्या डोक्यावर जोरदार वार करून त्याला जागीच ठार केले. बाळाची हत्या केल्यानंतर मनोरमा घाबरली तिने पुरावा नष्ट करण्यासाठी मुलाचा मृतदेह स्वयंपाकघरात लपवून ठेवला होता. मात्र, घटनेची माहिती मिळताच पोलिसांनी तातडीने तपास चक्रे फिरवली.

पोलिसांनी दिलेल्या माहितीनुसार, गुरुवारी पोलिसांनी आरोपी मनोरमा यादवला अटक केली. पोलिसांनी घराची झडती घेतली असता स्वयंपाकघरात लपवलेला बाळाचा मृतदेह त्यांच्या हाती लागला. पोलिसांनी याप्रकरणी कठोर कारवाई करत हत्येसाठी वापरलेला फरशीचा तुकडा जप्त केला आहे. पती-पत्नीमधील वादातून एका निष्पाप जिवाचा बळी गेल्याने हळहळ व्यक्त केली जात आहे. पोलीस सध्या या प्रकरणाचा अधिक तपास करत असून, आरोपी महिलेवर कायदेशीर गुन्हा दाखल करण्यात आला आहे.