Nashik : नाशिक हादरले! पोलिस असल्याचे सांगत व्यापाऱ्याचे अपहरण, २५ लाखांची खंडणीची मागणी; छळादरम्यान दुर्दैवी मृत्यू

अजय सोनावणे, मनमाड

Nashik Devala Road Tragedy News नाशिकमध्ये पोलिस पथक असल्याचे सांगून, गुटख्याने भरलेली पिकअप अडवून, २५ लाख रुपयांची खंडणीसाठी अपहरण करून दिलेल्या त्रासातून नाशिकच्या देवळा तालुक्यातील व्यापाऱ्याचा दुर्दैवी मृत्यू झाला. या प्रकरणी पोलिसांनी तिघांविरोधात गुन्हा दाखल करत शिताफीने अटक केली. जब्बार तांबोळी असे या घटनेत मृत्युमुखी पडलेल्या व्यापाऱ्याचे नाव आहे.

मिळालेल्या माहितीनुसार, तांबोळी हे गुजरातमधून पिकअप वाहनातून गुटखा भरून अभोणामार्गे देवळ्याकडे येत होते. या दरम्यान देवळा- कळवण रस्त्यावरील भऊर फाट्यावर काळया रंगाचे स्कॉर्पिओ वाहनातून आलेल्या तिघांनी त्यांना अडवलं. आम्ही पोलिस महानिरीक्षक पथकातील अधिकारी असल्याचे बतावणी करून २५ लाखांची खंडणी मागितली. खंडणीसाठी मृत जब्बार आणि पिक अप चालकाचे अपहरण केले.

अखेर तडजोडी अंती ११ लाख रुपये खंडणी देण्याचे ठरले. ठेंगोडा परिसरातील एका नर्सरीजवळ जब्बार यांचा मुलगा व काही ग्रामस्थ रक्कम घेऊन पोहचले. त्याचवेळी तांबोळी आणि संशयित आरोपींमध्ये बाचाबाची झाली. त्यातच जब्बार यांच्या छातीत दुखू लागले आणि ते बेशुध्द पडले. जब्बार बेशुद्ध पडल्यानंतर संशयितांनी अंधाराचा फायदा घेत पळ काढला.

दरम्यान बेशुध्द अवस्थेतील जब्बार तांबोळी यांना दवाखान्यात नेल्यानंतर डॉक्टरांनी त्यांना मृत घोषित केले. या प्रकरणी पोलिसांनी विलास जगताप, मोहम्मद शफीक मोहम्मद रफीक तसेच महेश भामरे या तिघा संशयितांविरुद्ध गुन्हा दाखल केला आहे. त्यांना अटक केली आहे.