अक्षय शिंदे पाटील, जालना प्रतिनिधी

deepak borade Dhangar reservation hunger strike Mumbai news : मुंबईमध्ये धनगर समाजाच्या एसटी आरक्षणाच्या अंमलबजावणीसाठी उपोषणाला बसलेल्या एका उपोषणकर्त्याच्या सासऱ्याने आत्महत्या केल्याची माहिती समोर आली आहे. आत्महत्या केलेल्या व्यक्तीचे नाव रामराव होळकर असे आहे. त्यांनी आत्महत्या का केली? याबाबतची अधिकृत माहिती अद्याप समोर आलेली नाही; पण उपोषणाला बसलेल्या जावयाची प्रकृती खालावल्याने होळकर यांनी टोकाचे पाऊल उचलल्याचे बोलले जात आहे.

मागील काही दिवसांपासून मुंबईमध्ये धनगर समाजाकडून आरक्षणासाठी उपोषण सुरू आहे. राज्यातील धनगर समाजाचे अनेक लोक मुंबईत दाखल झाले आहेत. यामध्ये जालना जिल्ह्यातील दीपक बोऱ्हाडे यांचाही समावेश आहे. धनगर समाजाच्या आरक्षणासाठी दीपक बोऱ्हाडे यांच्याकडून लढा दिला जात आहे. इतर कार्यकर्त्यांसोबतच तेही काही दिवसांपूर्वी मुंबईत आरक्षणाच्या लढ्यासाठी दाखल झाले होते. पण काही दिवसांपासून त्यांची प्रकृती खालावत आहे, त्यातच आता त्यांच्या सासऱ्याने टोकाचे पाऊल उचलल्याचे बोलले जात आहे.

धनगर समाजाच्या आरक्षणासाठी दीपक बोऱ्हाडे मुंबईत उपोषणाला बसले आहेत, तर दुसरीकडे जालन्यामध्ये बोऱ्हाडे यांचे सासरे रामराव होळकर यांनी आत्महत्या केली आहे. मिळालेल्या माहितीनुसार, होळकर यांनी आज दुपारी जावई दीपक बोऱ्हाडे यांच्या छत्रपती कॉलनीतील घरीच गळफास घेऊन आत्महत्या केली. या घटनेनंतर परिसरात एकच खळबळ उडाली आहे. या प्रकरणाबाबत धनगर समाजात हळहळ व्यक्त केली जात आहे.

दीपक बोऱ्हाडे मागील दहा दिवसांपासून मुंबईमध्ये उपोषणाला बसले असून त्यांची प्रकृती खालावत असल्याचे समजते. त्यातच होळकर यांनी आयुष्याचा दोर कापला. त्यांच्या आत्महत्येचे कारण अद्याप अस्पष्ट आहे, पण दीपक बोऱ्हाडे यांची उपोषणादरम्यान खालावत चाललेली तब्येत बघवत नसल्याने होळकर यांनी टोकाचे पाऊल उचलल्याची चर्चा गावात सुरू आहे.