मावळ : जगद्गुरु तुकोबाराय यांची तपोभूमी म्हणून ओळखल्या जाणाऱ्या मावळातील भामचंद्र डोंगराला बिल्डर, भूमाफिया यांनी विळखा घातला आहे. या भूमाफियांच्या मगरमिठीतून भामचंद्र डोंगराला मुक्त करण्यासाठी वारकरी आणि तुकाराम महाराज यांच्या भक्तांनी पुन्हा एकदा एल्गार पुकारला आहे. 

भामचंद्र मुक्तीची रणनीती ठरविण्यासाठी एक मीटिंग पुणे (Pune) येथे घेण्यात आली. यावेळी वारकरी संप्रदायातील अनेक मान्यवर उपस्थित होते. संत तुकाराम महाराज (Sant Tukaram Maharaj) यांची तपोभूमी म्हणून भामचंद्र डोंगर ओळखला जातो. याच डोंगरावर तुकाराम महाराज यांना साक्षात्कार झाला. आजही शेकडो साधक साधना, अभ्यास करण्यासाठी भामचंद्रावर राहत आहेत. मात्र गेल्या काही वर्षांपासून या तपोभूमीला बिल्डर आणि भूमाफियांनी पोखरायला सुरुवात केली आहे. त्या विरोधात मधुसूदन महाराज यांच्या नेतृत्वाखाली अनेक आंदोलन करण्यात आले. या आंदोलनाला यश आले आणि २०११ साली शासनाने अधिसूचना काढून हा भाग संरक्षित करण्यात आला.

मोठे जनआंदोलन उभारणार 

दरम्यान अतिक्रमण काही काळ थांबले. परंतु छुप्या पद्धतीने डोंगर पोखरण्याचे प्रयत्न सुरूच आहेत. हे प्रयत्न हाणून पाडण्यासाठी आणि आतापर्यंत झालेले सर्व अतिक्रमण हाटविण्यासाठी पुन्हा विशाल (Warkari) वारकरी आंदोलन पुकारण्याचा निर्णय पुणे येथे झालेल्या मीटिंगमध्ये घेण्यात आला. यावेळी हभप मधुसूदन महाराज यांच्या अध्यक्षतेखाली झालेल्या या मीटिंगला महाराष्ट्रातील ज्येष्ठ कीर्तनकार, सामाजिक कार्यकर्ते, तुकोबाराय भक्त उपस्थित होते. लवकरच एक मोठे जनआंदोलन उभे करण्याचा निर्णय या मीटिंगमध्ये घेण्यात आला.