जळगाव: शिवसेना शिंदे गटाचे जळगाव ग्रामीण विधानसभा क्षेत्रप्रमुख रहस्यमयरीत्या बेपत्ता झाल्याची घटना घडलीय. या घटनेने राजकीय वर्तुळात खळबळ उडालीय.संजय लोटन पाटील असं शिंदे गटाच्या नेत्याचे नाव असून जळगाव पोलीस ठाण्यात ते बेपत्ता झाल्याचा तक्रार नोंदवण्यात आलीय. संजय लोटन पाटील हे गुलाब पाटील यांचे निकटवर्तीय मानले जातात. संजय पाटील धरणगाव तालुक्यातील रहिवासी असून ते सध्या धुळे येथे वास्तव्यास होते.

काही दिवसांपूर्वी संजय पाटील गावाकडे जात असल्याचे सांगून घरातून निघाले होते. त्यादिवसापासून ते बेपत्ता आहेत. बेपत्ता झाल्याच्या दिवशी ते सीसीटीव्ही फुटेजमध्ये शहरातील एका बँकेतून पैसे काढताना आणि त्यानंतर कोर्ट चौकाकडे जाताना दिसले होते. पण त्यानंतर ते कुठे गेले याची काही माहिती मिळाली नाहीये. याबाबतचे वृत्त एका मराठी वृत्तवाहिनीने दिलंय.

दरम्यान संजय पाटील हे जळगाव रेल्वे स्थानकावर अयोध्येला जाणाऱ्या रेल्वेत बसले असावेत, अशी शक्यता व्यक्त केली जातेय. मात्र, यानंतर त्याच्यांशी कोणताही संपर्क झालेला नाहीये. संजय पाटील यांचा मोबाईल बंद असल्याने त्यांचा शोध घेणे पोलिसांसाठी आव्हानात्मक ठरतंय.

संजय पाटील हे पालकमंत्री गुलाबराव पाटील यांचे निकटवर्तीय असल्याचं सांगितलं जाते. जळगाव ग्रामीण विधानसभा क्षेत्रात त्यांचं मोठं नाव होतं. मूळचे धरणगाव तालुक्यातील दोनगावचे ते रहिवासी आहेत. संजय पाटील सध्या धुळ्यात वास्तव्यास होते.