संजय गडदे

Mumbai Weather Report:

मुंबईसह महाराष्ट्रात आज अनंत चतुर्दशीच्या मुहूर्तावर लाडक्या गणरायाचे विसर्जन होत आहे. मुंबईतील प्रसिद्ध गणपतीच्या विसर्जन मिरवणुकांना सुरुवात झाली असतानाच आता मुंबईत विजांच्या कडकडाटासह जोरदार पावसाला देखील सुरुवात झाली आहे. (Latest Marathi News)

मागील अर्ध्या तासापासून मुंबई पश्चिम उपनगरातील सांताक्रुज विलेपार्ले अंधेरी वर्सोवा गोरेगाव या भागात जोरदार पावसाला सुरुवात झाली आहे. सोबतच विजांचा कडकडाट देखील ऐकायला मिळत आहे. यामुळे मुंबईतील प्रसिद्ध अशा जुहू समुद्रावर गणपती विसर्जनासाठी आलेल्या नागरिकांनी देखील आपल्या बाप्पाचे विसर्जन त्वरित करून घराकडे निघणे पसंत केले आहे. यामुळे सध्या जुहू चौपाटीवरील गर्दी कमी झाल्याचे देखील पाहायला मिळत आहे.

मुंबईत गणपती आगमनाबरोबरच पावसाला सुरुवात झाली होती. कालपासून हवामानात मोठे बदल होत आहेत. काल सकाळपासूनच मुंबईच्या हवेतील उकाडा वाढल्यानंतर दुपारी मुंबईत मेघगर्जनेसह जोरदार पाऊस पडला. वातावरणातील आर्द्रतेमुळे हैराण झालेल्या मुंबईकरांना या पाऊससरींनी दिलासा मिळाला.

पुढील ४ तास महत्वाचे

गुरुवारीही अशाच प्रकारचे वातावरण पाहायला मिळाले असून जोरदार पावसाला सुरुवात झाली आहे. तसेच मुंबईसह उपनगरांना पुढील ४ तास महत्वाचे असल्याचा इशारा देण्यात आला आहे. हवामान खात्याकडून मुंबई, ठाणे, पालघर, रायगड या जिल्ह्यांमध्ये यलो अलर्ट तर रत्नागिरी आणि सिंधुदुर्ग येथे ऑरेंज अलर्ट देण्यात आला आहे.

मात्र आज आपल्या लाडक्या गणरायाला निरोप देत असताना गणेश मंडळाकडून भव्य मिरवणुका काढल्या जातात या मिरवणुकांवर मात्र अचानक आलेल्या या पावसाने विर्जन पडले असेच म्हणावे लागेल. भक्तांच्या उत्साहावर देखील पावसाचे विरजण पडले आता दुपारनंतर मुंबईतील सर्वच घरगुती आणि सार्वजनिक गणपती विसर्जनासाठी मार्गस्थ होतील. मात्र पावसाचा जोर असाच राहिला तर गणेश मंडळांना आणि भक्तांना गणपतीच्या मिरवणुका आटोपत्या घ्याव्या लागतील आणि विसर्जन वेळेत उरकून घ्यावे लागेल असेच चित्र सध्यातरी पाहायला मिळत आहे.