अक्षय गवळी, अकोला

मराठा आंदोलक जरांगे पाटील यांची आज बीड जिल्ह्यातील मांजरसुंब येथे अंतिम निर्णायक सभा होणार आहे. या सभेसाठी मराठा समाज बांधव मोठ्या संख्येने यायला सुरूवात झाली आहे. या सभेवरून ओबीसी नेते लक्ष्मण हाके यांनी मनोज जरांगेंवर अनेक गंभीर आरोप केले आहेत. जरांगेंच्या या बैठकीसह इतर बैठका या सरकार पुरस्कृत आहेत. ही राज्यकर्ते पुरस्कृत झुंडशाही असल्याचा आरोप लक्ष्मण हाके यांनी केला आहे.

मनोज जरांगेंना या बैठकांसाठी एका मतदारसंघातून आमदार १० ते १५ लाख रुपये देत असल्याचा आरोप लक्ष्मण हाके यांनी केला आहे. यामुळेच मराठवाड्यातल्या छोट्या-छोट्या गावातही जरांगेंची मोठमोठी बॅनर्स आणि पोस्टर्स लागल्याचे ते म्हटलेय. ओबीसीमध्ये आरक्षण घेऊन मराठा समाजाला व्यवस्था हातात घ्यायची आहे. आरक्षणाच्या माध्यमातून नोकरशाहीमध्ये आपली लोक घुसवण्याचा त्यांचा प्रयत्न असल्याचा आरोप हाकेंनी केला आहे. यासंदर्भात महाराष्ट्रातील कोणत्याच नेतृत्वाकडून आता अपेक्षा नाहीये. त्यामुळे यासंदर्भात केंद्रातील ओबीसी नेत्यांना साकडं घालणार असल्याचं हाकेंनी स्पष्ट केलं.

दरम्यान, राष्ट्रवादीचे आमदार अमोल मिटकरींवर लक्ष्मण हाकेंनी पुन्हा एकदा बोचरी टीका केली. अमोल मिटकरी हे फार मोठे व्यक्ती नाहीत. मिटकरी हे अजित पवारांनी विरोधकांवर भुंकण्यासाठी ठेवलेला कुत्रा असल्याचा प्रहार हाकेंनी केलाय. दरम्यान, 'बिग बॉसच्या घरात अमोल मिटकरी चार-पाच तासही टिकणार नाहीत. तिथून बाहेर आल्यानंतर त्यांना काही काम उरणार नाहीय. त्यामुळे महाराष्ट्रातील काही तमाशा मंडळाना आपण त्यांच्यासाठी सोंगाड्या किंवा ढोलकीवाला म्हणून काम देण्यासाठी‌ विनंती करेल.', असा चिमटा देखील हाकेंनी मिटकरींना काढलाय.