संदिप भोसले, साम टीव्ही

मुंबईतील आंदोलनात सहभागी झालेले आंदोलकांचे राहण्यापासून जेवणाचे प्रचंड हाल होत असल्याचे निर्दशर्नास येत आहे. सुविधांची वाणवा असताना आंदोलक तीव्रपणे आरक्षणाची मागणी करताना दिसत आहेत. याच आंदोलनात सहभागी झालेल्या लातुरातील मराठा आंदोलकाचा हृदयविकाराच्या झटक्याने मृत्यू झाला. विजय घोगरे असे मृत्यू पावलेल्या कार्यकर्त्याचं नाव आहे. मृत तरुण लातूरच्या अहमदपूर तालुक्यातील टाकळगाव येथील असल्याची माहिती मिळत आहे.

मराठा आरक्षणासाठी मुंबई येथे मनोज जरांगे आमरण उपोषण करत आहेत. दोन दिवसांपूर्वीच, मुंबईकडे कूच करताना जुन्नर येथे एका मराठा कार्यकर्त्याचा हृदयविकाराच्या झटक्याने दुर्दैवी मृत्यू झाला होता. आज पुन्हा मुंबई येथे आंदोलनात सहभागी असलेल्या विजय घोगरे या मराठा कार्यकर्त्याचा हृदयविकाराच्या झटक्याने दुर्दैवी मृत्यू झाला.

लातूरच्या अहमदपूर तालुक्यातील टाकळगाव येथील रहिवासी असल्याची माहिती समोर येत आहे. या तरुणाला उपचारासाठी जे जे रुग्णालयात हलवण्यात आले होते. मात्र डॉक्टरने या कार्यकर्त्याला मृत घोषित केले आहे. तरुणाच्या मृत्यूने त्याच्या कुटुंबावर दु:खाचा डोंगर कोसळला आहे.