अभिजित देशमुख 
कल्याण : पॉक्सो कायद्यानुसार बाल लैंगिक अत्याचाराच्या गुन्ह्यात टिटवाळा पोलीस ठाण्याच्या ताब्यात असलेला आरोपी शुक्रवारी सायंकाळी कल्याण रेल्वे स्थानक परिसरातुन पोलिसांना चकवा देत पसार झाला होता. पोलिसांनी त्याचा पाठलाग केला. मात्र गर्दीचा फायदा घेत त्याने धूम ठोकली. मात्र पोलिसांनी फरार झालेल्या या आरोपीला आठ तासाच्या आत रायगडच्या रोहा येथून ताब्यात घेतले आहे. 

चैतन्य शिंदे याच्यावर टिटवाळा पोलीस ठाण्यात बाल लैंगिक अत्याचाराचा गुन्हा दाखल करण्यात आला होता. या सुनावणीसाठी त्याला कोठडी संपल्याने टिटवाळा पोलिसांनी शुक्रवारी कल्याण जिल्हा व सत्र न्यायालयात हजर केले. न्यायालयाने त्याला २० जूनपर्यंत न्यायालयीन कोठडी सुनावली. त्यानंतर त्याला आधारवाडी कारागृहात नेण्यासाठी पोलिसांनी कोर्टाच्या बाहेर वाहनात बसवून पोलीस स्टेशनला नेण्यासाठी आणले.  

हाताला झटका देत झाला पसार 

दरम्यान पोलिसांनी त्याला बेड्या घालण्याचा प्रयत्न करत असताना चैतन्यने अचानक दोघा पोलीस अधिकाऱ्यांना जोरदार झटका दिला. गर्दीचा फायदा घेत कल्याण रेल्वे स्थानकाच्या दिशेने धूम ठोकली. या दरम्यान पोलिसांनी त्याचा फाटला करण्याचा प्रयत्न केला. मात्र तो गर्दीचा फायदा घेत पसार झाला. या घटनेमुळे पोलीस यंत्रणेत खळबळ उडाली असून परिसरात शोधमोहीम सुरू केली.

सीसीटीव्ही तपासात रोहा येथून घेतले ताब्यात 
कल्याण रेल्वे स्टेशन परिसरातील सीसीटीव्ही फुटेज व तांत्रिक बाबींचा तपास करत पोलिसांनी चैतन्यचा शोध सुरू केला. चैतन्य रायगड येथील रोहा येथे लपून बसल्याची माहिती पोलिसांना मिळाली. या माहितीच्या आधारे पोलिसांनी तत्काळ सापळा रचत रायगड जिल्ह्यातील रोहा येथून चैतन्य शिंदे याला अवघ्या आठ तासात बेड्या ठोकल्या.