Pandharpur : टोकन दर्शन प्रणालीची १५ जूनला पहिली चाचणी; आषाढीच्या टोकन दर्शनाची तयारी सुरू

पंढरपूर : भाविकांना विठुरायाचे वेळेत आणि सुलभ दर्शन व्हावे; यासाठी विठ्ठल मंदिर समितीने टोकन दर्शन प्रणाली सुरू करण्याचा निर्णय घेतला आहे. ही प्रणाली येत्या १५ जून पासून सुरू करण्यात येणार आहे. टोकन दर्शन सुविधेची मंदिरात आता तयारी सुरू झाली आहे. अर्थात आषाढीच्या पार्श्वभूमीवर भाविकांची होणाऱ्या गर्दीत हि सुविधा भाविकांसाठीच सोयीची ठरणार आहे. 

पंढरपूरमध्ये दर्शनासाठी मोठ्या संख्येने भाविक येत असतात. आषाढी, कार्तिकी एकादशीला अधिक प्रमाणात गर्दी असते. यामुळे भाविकांच्या मोठ्या दर्शन रांगा लागत असतात. यात विठुरायाचे दर्शन घेण्यासाठी तासंतास दर्शन रांगेत उभे राहावे लागत असते. मात्र भाविकांना सोयीचे व्हावे, तसेच लवकर दर्शन घेता यावे; यासाठी विठ्ठल मंदिर समितीने तिरुपती बालाजीच्या धर्तीवर टोकन दर्शन सुविधा सुरु करण्याचा निर्णय घेतला आहे. याची टेस्टिंग करण्यात येत आहे. 

चाचणी यशस्वी झाल्यास प्रणाली सुरु 

पंढरपुरात येणाऱ्या भाविकांसाठी हि सुविधा आषाढी यात्रेच्या पार्श्वभूमीवर सुरु करण्यात येत आहे. आषाढी यात्रेपासून हि सुविधा कायमस्वरूपी सुरु होणार असून प्रायोगिक तत्वावर याची चाचणी करण्यात आली आहे. मात्र टोकन दर्शनाची पहिली चाचणी १५ जून रोजी घेण्यात येणार आहे. चाचणी यशस्वी झाली तर ही प्रणाली पुढे सुरू ठेवली जाईल; असं ही मंदिर समितीचे कार्यकारी अधिकारी राजेंद्र शेळके यांनी सांगितले आहे.

भाविकांचा वाचणार वेळ 

मंदिर समितीच्या अधिकृत वेबसाईटसह पंढरपुरातील रेल्वे, बसस्थानकासह मंदिर परिसरात टोकन नोंदणी सेंटर सुरू करण्यात येणार आहे. टोकन दर्शन सुविधेमुळे भाविकांना दिलेल्या वेळेत दर्शन घेता येणार आहे. या सुविधेमुळे व्हीआयपी दर्शनाला चाप बसणार आहे. शिवाय भाविकांना तासन् तास दर्शन रांगेत उभे राहण्याचा त्रास देखील कमी होणार आहे.