लोकसभा निवडणुकीतली अपयशाची पुनरावृत्ती होऊ नये म्हणून राष्ट्रवादी काँग्रेसच्या अजित पवार गटाने विधानसभेसाठी जोरदार तयारी सुरू केलीय. राज्यव्यापी जन सन्मान मेळावा आयोजित करून कार्यकर्त्यांमध्ये नवी चेतना भरण्याचा प्रयत्न अजितदादांचा आहे. त्यासाठी अजितदादांनी लाडकी बहीण योजनेचं कार्ड बाहेर काढलंय. त्यासाठी दादांनी पिंक पॉलिटिक्सची रणनीती आखलीय.

अजित पवार एवढ्यावरच थांबले नाहीत तर आता जाहीर सभेत दादांनी लाडकी बहीण योजना सुरू ठेवायची असेल आमच्या नावाची बटणं दाबा अशी महिलांना साद घातलीय. तर ही योजना योग्य पद्धतीनं सुरू ठेवण्यासाठी मविआची गरज असल्याचा सांगत जयंत पाटलांनी अजितदादांवर कुरघोडी करण्याचा प्रयत्न केलाय. उपमुख्यमंत्री अजित पवार म्हणाले आहेत की, ''योजनांसाठी आम्हाला मतदान करा.''

राज्यात लोकसभा निवडणुकांवेळी उपमुख्यमंत्री अजित पवारांनी बारामतीच्या प्रचारसभेत, तुम्हाला पाहिजे तेवढा निधी देऊ, मात्र आमच्यासाठी मशीनमध्ये कचाकच बटणं दाबा, असं विधान केलं होतं. मात्र तरीही त्याचा दादांना लाभ झाला नव्हता. मात्र या वक्तव्याचा विरोधकांनी चांगलाच समाचार घेतला होता.

आता पुन्हा विधानसभेच्या तोंडावर दादांनी योजना हव्या असल्यास बटणं दाबण्याचं आवाहन केलंय. त्यामुळे लाकडी बहीण कुणाच्या नावासमोरचं बटण दाबणार आणि कुणाला सत्येबाहेर ठेवणार याचीच उत्सुकता आहे.