Sanjay Raut Press Conference : जागा वाटपावर संजय राऊतांची प्रतिक्रिया; सांगितले मविआच्या जागांचे सूत्र

200 पेक्षा जागांवर आमच्यात सहमती आहे. उरलेल्या जागांचा तिढा आहे. यावर मी सर्व नेत्यांशी चर्चा केली असून राहुल गांधी यांच्याशी चर्चा करणार असल्याचं खासदार संजय राऊत यांनी म्हंटलं आहे. महाराष्ट्रात प्रत्येकाला आपला पक्ष टिकवायचा आहे आणि चालवायचा आहे. कार्यकर्त्यांच्या भावना देखील पहाव्या लागतात. त्यामुळे जास्त खेचाखेची योग्य नाही, पण निर्णय लवकर व्हावेत,असंही त्यांनी म्हंटलं आहे. ते शुक्रवारी सकाळी प्रसारमाध्यमांशी बोलत होते.

यावेळी बोलताना त्यांनी, 'जागावाटपाच्या रखडलेल्या निर्णयाला गती मिळाली पाहिजे. आम्हाला महाराष्ट्राचा जास्त अनुभव आहे. भापज विरोधात कसं लढायचं हे आम्हाला माहीत आहे, आमच्यामध्ये जवळपास बऱ्याच जागांमध्ये सहमती झाली असून काही जागांचा तिढा आहे. याबाबत मी उद्धव ठाकरे यांच्याशी चर्चा केली असून आज राहुल गांधी यांच्याही बोलणार आहे,' असंही त्यांनी म्हंटलं आहे.