संजय महाजन, साम टीव्ही प्रतिनिधी

अक्षय्य तृतीयेच्या दुसऱ्याच दिवशी सोन्याच्या दरात घसरण झाली आहे. आज जळगावच्या सराफा बाजारपेठेत सोन्याच्या किंमती घसरल्या आहेत. सोन्याच्या दरात ८०० रुपयांची घसरण झाली आहे तर चांदीदेखील ५००० रुपयांनी घसरली आहे. सोन्याचे दर घसरल्याने मात्र खरेदीदांराना दिलासा मिळाला आहे.

सध्या लग्नसराईचे दिवस सुरु आहे. या दिवसात सोन्याची मागणी मोठ्या प्रमाणात वाढते. सोन्याचे दागिने बनवले जातात. परंतु सध्या सोन्याचे दर खूप झपाट्याने वाढत आहे. त्यामुळे सोनं खरेदी करावं की नाही असा प्रश्नच पडला आहे. याच दरात किंचिंत घसरण झाली असल्याने थोडासा दिलासा मिळाला आहे.

आजचे सोन्याचे दर (Gold Rate Today 24K Rates)

जळगावच्या सराफा बाजारपेठेत सोन्याचे दर जीएसटीसह १ लाख ५६ हजार रुपयांवर गेले आहेत. तर १ किलो चांदीचे दर २ लाख ६२ हजार ६५० रुपयांवर आहेत. सोन्याचे दर जरी घसरले असले तरी ते दीड लाखांपेक्षा जास्त आहेत.

जळगावात अक्षय्य तृतीयेला सराफा बाजारात ६० कोटींचा उलाढाल

अक्षय्य तृतीयेला शहराचे तापमान ४१.६ अंश असतानाही विविध शो रुम आणि सुवर्णपेढ्यांमध्ये गर्दी दिसून आली. सराफा बाजारपेठेत ५५ ते ६० कोटींची उलाढाल रविवारी सोने १,५७,६९३ रुपये तोळा तर चांदी २,६७,८०० रुपये किलो होती. दरवाढीमुळे यंदा सोने, चांदीची खरेदी कमी होईल असा अंदाज ग्राहकांनी खोटा ठरवला. सुरक्षित गुंतवणूक आणि मुहूर्तावरील विश्वासाने ग्राहकांचा अर्धा ग्रॅमपासून दोन तोळ्यापर्यंत सोने खरेदीकडे कल दिसून आला. लग्नसराई सुरू असल्यामुळे अनेकांनी मणी मंगळसूत्राला प्राधान्य दिले. त्याचबरोबर नेकलेस, सोन्याच्या बांगड्या, सोन्याची चेन, अंगठीसह सर्व प्रकारचे दागिने खरेदीसाठी उत्साह दिसून आला. त्यामुळे सराफा बाजारात दिवसभरात ५५ ते ६० कोटींची उलाढाल झाल्याचे व्यावसायिक आकाश भंगाळे यांनी सांगितले.