गडचिरोली : मागील पाच- सहा दिवसांपासून विश्रांती घेतलेल्या पावसाने आज गडचिरोली व नागपूरमध्ये जोरदार हजेरी लावली. या दरम्यान वीज पडून शेतकरी महिलेचा मृत्यू झाला. तर अन्य एक जण गंभीर जखमी झाल्याची घटना जिल्ह्यातील सावली तालुक्यातील केरोडा गावात घडली. 

चित्रकला सुधाकर भुरसे असे घटनेत मृत झालेल्या महिलेचे नाव आहे. आठ दिवसांच्या विश्रांतीनंतर आज दुपारच्या सुमारास अचानक (Gadchiroli) गडचिरोलीच्या सावली तालुक्यात मेघगर्जनेसह पावसाने हजेरी लावली. सकाळी उघडीप असल्याने शेतीच्या कामासाठी अनेकजण शेतात गेले होते. या दरम्यान शेतात काम करीत असलेल्या महिलेच्या अंगावर वीज (Lightning Strike) कोसळली. त्यात चित्रकला भुरसे या महिलेचा जागीच मृत्यू झाला. तर सोबत असलेला एकजण जखमी आहे. जखमीला उपचारासाठी ग्रामीण रुग्णालयात हलवण्यात आले आहे.

नागपुरच्या काही भागात जोरदार सरी
नागपूर : मागील दोन ते तीन दिवसांपासून पावसाने उघडीप दिली होती. यानंतर कडक ऊन पडत होते. मात्र आज अचानक दुपारपासून ढगाळ वातावरण निर्माण होऊन पुन्हा एकदा पावसाच्या जोरदार सरी कोसळल्या. (Nagpur) नागपूर शहरातील अनके भागात विजांचा कडकडाटसह पावसाचे आगमन झाले. ढगाळ वातावरण झाल्याने काळोख पसरल्याने दिवसा लाईट लावण्याची वेळ वाहन चालकांवर आली होती.