चंद्रपूर : ताडोबा अंधारी व्याघ्र प्रकल्पातील ऑनलाईन बुकींग घोटाळा समोर आला आहे. या घोटाळ्यातील आरोपी रोहीत विनोद ठाकूर आणि अभिषेक विनोद ठाकूर यांना सक्तवसूली संचालनालयाने (ईडी) दणका दिला आहे. त्यांची नागपूर आणि चंद्रपूरातील तब्बल १३ कोटी ७१ लाखांची मालमत्ता जप्त करण्यात आली आहे. यात स्थावर मालमत्ता आणि बॅंक खात्यातील रकमेचा समावेश आहे. 

वाइल्ड कनेक्टिव्हिटी सोल्युशनचे संचालक रोहीत आणि अभिषेक ठाकूर आहेत. या कंपनीकडे चंद्रपुरातील ताडोबा- अंधारी व्याघ्र प्रकल्पातील सफारी बुकिंग, प्रवेश शुल्क, जिप्सी शुल्क आणि मागदर्शक शुल्काची रक्कम गोळा करण्यासाठीची जबाबदारी होती. या करारानुसार ऑनलाईन बुकिंगचा पर्यटकांचा पैसा ठाकूर यांच्या बँक खात्यात जमा होत होती. करारानुसार ताडोबातील जिप्सी, गाईड यांना नियमित पैसे द्यायचा होता. परंतु त्यांनी दिली नाही. 

१६.५ कोटी रुपयांची अफरातफर 

दरम्यान सन २०२०-२१ ते २०२३-२४ या कालावधीत त्यांनी १६.५ कोटी रुपयांची अफरातफर केली. ताडोबा प्रकल्पाचे तत्कालीन क्षेत्र संचालक तथा मुख्य वनसंरक्षक डॅा. जितेंद्र रामगावकर यांनी २०२३ मध्ये यासंदर्भात रामनगर पोलिस ठाण्यात तक्रार दाखल केली होती. त्यानुसार ८ एप्रिल २०२४ ला ठाकूर बंधूंना अटक करण्यात आली होती. न्यायालयाने त्यांनी जामीन नाकारत दोन कोटी ४९ लाख रुपये जमा करण्याचे आदेश दिले. 

मालमत्ता केली जप्त 

दरम्यानच्या काळात डॅा. रामगावकर यांनी या घोटाळ्याची तक्रार सक्त वसूली संचालनालयाकडे केली होती. मात्र, तत्पूर्वीच ८ जानेवारी २०२५ ला सक्तवसुली संचालनालयाने त्यांच्या चंद्रपुरातील प्रतिष्ठानवर छापा टाकला. त्यात १ कोटी ४२ लाख रुपयांचे सोने, चांदी, प्लॅटिनम आणि महत्वाची कागदपत्र जप्त केली. आता ईडीने १३.७१ कोटी रुपयांची मालमत्ता जप्त केली आहे.