• सिंधुदुर्गमध्ये भाजपला मोठा धक्का

• नितेश राणे मतदारसंघात शिवसेनेची ताकद वाढली

• नेर्ले गावच्या सरपंचांचा ठाकरे गटात प्रवेश

• वैभववाडीतील शेकडो कार्यकर्त्यांचा शिवसेनेत पक्षप्रवेश

विनायक वंजारी, सिंधुदुर्ग

कोकणामध्ये मोठी राजकीय घडामोड घडली. भाजपला मोठं खिंडार पडलं. नितेश राणेंच्या मतदारसंघात ठाकरेंच्या शिवसेनेने भाजपला मोठा धक्का दिला. वैभववाडीतील नेर्ले गावचे भाजपचे सरपंच, उपसरपंच यांच्यासह शेकडो कार्यकर्त्यांनी ठाकरेंच्या शिवसेनेत प्रवेश केला. या पक्ष प्रवेशामुळे कोकणात उद्धव ठाकरेंची ताकद चांगलीच वाढली आहे. हा नितेश राणेंसाठी सर्वांत मोठा धक्का मानला जात आहे.

वैभववाडी तालुक्यात ठाकरेंच्या शिवसेनेने भाजपला जोरदार धक्का दिला. मंत्री नितेश राणे यांच्या मतदारसंघातील वैभववाडी नेर्ले गावच्या सरपंच निलांबरी पांचाळ, उपसरपंच पंढरीनाथ सुर्वे आणि ग्रामपंचायत सदस्यासह शेकडो ग्रामस्थांनी ठाकरेंच्या शिवसेनेत प्रवेश केला. माजी खासदार विनायक राऊत, माजी आमदार तथा जिल्हाप्रमुख वैभव नाईक, माजी आमदार परशुराम उपरकर, युवासेना जिल्हाप्रमुख सुशांत नाईक यांच्या प्रमुख उपस्थितीत हा पक्ष प्रवेश सोहळा पार पडला.

भगवी शाल घालून प्रवेशकर्त्यांचे पक्षात स्वागत करण्यात आले. सध्या सिंधुदुर्ग जिल्ह्यात ठाकरेंची साथ सोडत मोठ्याप्रमाणात कार्यकर्ते पदाधीकारी भाजपमध्ये प्रवेश करत असताना नितेश राणेंच्याच मतदारसंघात नेर्ले गावच्या सरपंच, उपसरपंचानी ठाकरेंच्या शिवसेनेत केलेला प्रवेश महत्त्वाचा मानला जात आहे. या प्रवेशामुळे मंत्री नितेश राणेंना हा मोठा धक्काच मानला जात आहे. या पक्षप्रवेशामध्ये वैभववाडीत ठाकरेंची ताकद वाढली आहे. या पक्षप्रवेशादरम्यान सर्वांनी भाजपबाबत नाराजी व्यक्त केली.