Maharashtra News Live Update: परभणी जिल्ह्यात मागील पंधरा दिवसांपासून पावसाची दांडी

परभणी जिल्ह्यात मागील 15 दिवसांपासून पावसाने दांडी मारल्याने शेतकऱ्यांची चिंता वाढली आहे. यंदाच्या हंगामाच्या सुरुवातीपासूनच पावसाने अपेक्षित साथ न दिल्याने पिकांची वाढ खुंटली आहे. कापूस, सोयाबीन आणि तूर ही प्रमुख पिके आता पाण्याअभावी माना टाकू लागली आहेत. ऑगस्ट महिन्यात कापसाला बोंडधारणा होऊन त्याची चांगली वाढ झालेली अपेक्षित असताना अनेक भागांत कापूस अद्याप गुडघ्याएवढाच राहिला आहे.

हिंगोली मध्ये आमदार संतोष बांगर यांच्या कावड यात्रेच्या कार्यक्रमाला उपस्थित असलेले शिवसेनेचे नेते व खासदार श्रीकांत शिंदे यांच्यापुढे शिवसेनेचे आमदार संतोष बांगर यांचे भावी मंत्री म्हणून कार्यकर्त्यांनी पोस्टर झळकावले आहेत.

कावड यात्रेच्या समारोप कार्यक्रमात श्रीकांत शिंदे यांची गांधी चौक येथे सभा आयोजित करण्यात आली होती.

घोडबंदर रोडवरील हिरानंदानी पार्कसमोर ठाण्याच्या दिशेने जाणाऱ्या मार्गावर Maruti Suzuki Swift, क्रमांक MH 43 AN 1989 या कारने पेट घेतला.

वाहनात चालकासह दोन प्रवासी असे एकूण तीन जण प्रवास करत होते.

आग लागताच तिघांनीही वेळीच वाहनाबाहेर पडत स्वतःचा बचाव केला.

सुदैवाने या घटनेत कोणालाही दुखापत झाली नाही.

घटनास्थळी वाहतूक पोलीस आणि अग्निशमन दलाचे जवान एका फायर वाहनासह दाखल झाले.

अग्निशमन दलाच्या जवानांनी प्रयत्न करत पहाटे १ वाजून २६ मिनिटांनी वाहनाला लागलेली आग पूर्णपणे विझवली आहे. कुठलीही जिवितहानी झालेली नाहिये.

जालन्यातील टेंभुर्णी पोलिसांचा वाहन थेट बोटीवर चढवून नदीतून प्रवास केल्याचा व्हिडिओ समोर आलाय.जालन्यातील जाफराबाद तालुक्यातील डोलखेडा गावात जाण्यासाठी टेंभुर्णी पोलिसांना जीवघेणी कसरत करावी लागत आहे.जाफराबाद तालुक्यातील वरुड गावातून डोलखेडा गावात जाण्यासाठी नदीवर पूल नसल्यामुळे नागरिकांसह पोलिसांना जीव मुठीत धरून प्रवास करावा लागत आहे. नदीच्या पाण्यातून बोटीवर पोलीस वाहन चढवून प्रवास करतानाचा टेंभुर्णी पोलिसांचा व्हिडिओ व्हायरल झाला आहे...

मतदार याद्यांच्या विशेष सखोल पुनरीक्षण कार्यक्रमांतर्गत भारत निवडणूक आयोगाकडून सुधारित वेळापत्रक जाहीर करण्यात आले असून त्याअन्वये ३१ ऑगस्ट रोजी प्रारूप मतदार यादी प्रसिद्ध होणार आहे. तर ३१ ऑगस्ट ते ३० सप्टेंबर २०२६ या कालावधीत प्राप्त झालेल्या दावे व हरकतींवर २९ ऑक्टोबर पर्यंत सुनावण्या घेण्यात येणार आहेत, अशी माहिती उप जिल्हा निवडणूक अधिकारी मीनल कळसकर यांनी राजकीय पक्षांच्या प्रतिनिधींसोबत आयोजित साप्ताहिक बैठकीत दिली.