योगेश काशिद, बीड

बीडच्या मस्साजोगचे सरपंच संतोष देशमुख हत्या प्रकरण ताजे असतानाच बीडमध्ये आणखी एका तरुणाने अपहरण करून त्याला बेदम मारहाण केल्याची धक्कादायक घटना समोर आली आहे. बीडच्या परळीमध्ये तरुणाचे पेट्रोल पंपावरून अपहरण केले. त्यानंतर त्याला लाठ्याकाठ्याने आणि बेल्टने अमानुष मारहाण करण्यात आली. याप्रकरणी परळी ग्रामीण पोलिस ठाण्यात आरोपींविरोधात गुन्हा दाखल करण्यात आला आहे.

मिळालेल्या माहितीनुसार, बीडच्या परळी येथील पेट्रोल पंपासमोरून तरुणाचे अपहरण करण्यात आले. शिवराज हनुमान दिवटे या तरुणाचे शुक्रवारी सायंकाळी ४ वाजता काही तरुणांनी अपहरण केले. जलालपूर भागातील डोंगरपट्ट्यात असलेल्या रत्नेश्वर मंदिर परिसरात नेऊन या तरुणाला लाठ्याकाठ्या आणि बेल्टने अमानुष मारहाण करण्यात आली. सांप्रदायिक कार्यक्रमाच्या जुन्या वादावरून तरुणाला मारहाण करण्यात आली. समाधान मुंडे आणि त्याच्या इतर साथीदारांनी शिवराज दिवटे या तरुणाला ही मारहाण केली. या घटनेमुळे बीडमध्ये खळबळ उडाली.

काही नागरिकांनी तरुणाला मारहाण करताना पाहिले त्यांनी आरोपींना रोखले त्यामुळे तरुणाचे प्राण वाचले. या मारहाणीमध्ये तरुण गंभीर जखमी झाला आहे. त्याच्यावर सुरूवातीला परळी येथे उपचार करण्यात आले. पण पुढील उपचारासाठी त्याला अंबाजोगाईतील स्वराची रग्णालयात हलवण्यात आले. या मारहाणीचा व्हिडीओ देखील समोर आला असून तो सोशल मीडियावर व्हायरल होत आहे.

या प्रकरणी आता बीडचे पोलिस अध्यक्ष नवनीत कावंत यांनी थेट आरोपींविरोधात गुन्हा दाखल करून त्यांना तात्काळ अटक करण्यात यावी असे आदेश संबंधित पोलिस स्टेशनला दिले आहेत. या प्रकरणी आरोपीविरोधात परळीच्या ग्रामीण पोलिस ठाण्यामध्ये गुन्हा दाखल करण्यात आला आहे. आरोपींच्या शोधासाठी बीड पोलिसांचे विशेष दोन पथक वेगवेगळ्या भागात रवाना करण्यात आले आहेत.