Nashik Crime : लग्नाच्या वर्षपूर्तीनिमित्त नवीन WhatsApp DP, नवऱ्याची मैत्रीण भडकली, नाशिकमध्ये तरुणाची हत्या

नाशिक : लग्नाच्या वर्षपूर्तीनिमित्त तरुणाने पत्नीसोबत ठेवलेल्या 'व्हॉट्सअॅप डीपी'मुळे त्याची मैत्रीण भडकली. त्यामुळे तिने भावासह नातलगांच्या मदतीने संबंधित तरुणाला मारहाण करीत त्याची हत्या केल्याची घटना समोर आली आहे. नाशिक तालुका पोलिसांच्या हद्दीत विल्होळीत घडलेल्या हत्येप्रकरणी नाशिक शहर गुन्हे शाखा युनिट एकच्या पथकाने एका महिलेसह पुरुषाला अटक केली आहे. या दोन्ही संशयितांना नाशिक जिल्हा न्यायालयाने पोलीस कोठडी सुनावली आहे.

तालुका पोलिसांनी दिलेल्या माहितीनुसार दि. १३ मे रोजी सकाळी विल्होळी शिवारातील जैन मंदिराजवळील मोकळ्या जागेत सुरज काशीनाथ घोरपडे (वय ३९, रा. सातपूर) याचा मृतदेह आढळला होता. या प्रकरणी सुरजच्या भावाने दिलेल्या फिर्यादीवरून खुनाचा गुन्हा नोंदविण्यात आला.

तपासादरम्यान शहर पोलीस दलाच्या गुन्हे शाखा युनिट एकचे वरिष्ठ निरीक्षक मधुकर कड यांनी संशयितांचा शोध घेण्याची सूचना केली. त्यानुसार अंमलदार नितीन जगताप यांना मिळालेल्या माहितीनुसार त्र्यंबकेश्वरमध्ये सापळा रचून संशयित इंदू विजय साळवे हिच्यासह तिचा भाऊ शशिकांत उर्फ नाना रामदास गांगुर्डे (वय २७, संघर्षनगर, विल्होळी) या दोघांना अटक करून नाशिक तालुका पोलिसांच्या ताब्यात दिलं.

सहायक निरीक्षक हिरामण भोये, उपनिरीक्षक चेतन श्रीवंत, अंमलदार महेश साळुंके, मुक्तार शेख यांच्या पथकाने ही कारवाई केली. दरम्यान, नाशिक तालुका पोलिसांनी दोन्ही संशयितांना बुधवारी १४ मे रोजी दुपारी जिल्हा न्यायालयात हजर केल्यावर त्यांना पोलीस कोठडी सुनावण्यात आली. तालुका पोलीस ठाण्याचे निरीक्षक सत्यजित आमले यांचे पथक तपास करीत आहे.