योगेश काशीद 

बीड : बीड जिल्ह्यात मागील काही महिन्यात गुन्हेगारीचे प्रमाण वाढले आहे. अगदी क्षुल्लक कारणातून हाणामारी, खून केल्याच्या घटना घडत आहेत. अशात घरासमोर असलेल्या रस्त्यावरून जाण्याच्या क्षुल्लक कारणातून महिलेला जबर मारहाण करण्यात आल्याची घटना घडली आहे. मारहाणीत महिला गंभीर जखमी झाली असून सदर महिलेवर उपचार सुरु आहेत. तर घटनेमुळे परिसरात खळबळ उडाली आहे. 

बीड जिल्ह्यातील अंजनवती या गावात सदरची धक्कादायक घटना घडली आहे. या घटनेत प्रियंका गाढवे असे गंभीर जखमी झालेल्या महिलेचे नाव आहे. काही दिवसांपूर्वीच अंजनवती गावात भावकीतील काही जणांनी महिलेला मारहाण केली होती. ही घटना ताजी असतानाच गावात पुन्हा एका महिलेला मारहाण झाली आहे. सलग दुसऱ्या घटनेने खळबळ उडवून दिली आहे. या प्रकरणी पोलीस तपास करत आहेत. 

क्षुल्लक कारणातून शेजाऱ्यांकडून मारहाण 

गावात लहान गल्ली आणि अरूंद रस्ते असल्याने घराच्या समोरूनच जावे लागत असते. अशात घरासमोरील रस्त्यावरून जाऊ नको; असे सांगितल्याचा क्षुल्लक कारणावरून महिलेला जबर मारहाण करण्यात आली आहे. यात महिलेच्या शेजारी राहणाऱ्या व्यक्तीने शेतीच्या अवजाराने डोक्यात वार करून महिलेला जखमी केले. यात महिला जखमी झाली असून जखमी महिलेवर जिल्हा रुग्णालयात उपचार सुरू आहेत. 

बीड जिल्ह्यात  वाढती गुन्हेगारी 

दरम्यान बीड जिल्ह्यात वाढती गुन्हेगारी चिंतेचा विषय बनत चालला आहे. कारण जिल्ह्यात रोज कुठे ना कुठे अगदी क्षुल्लक कारणातून मारहाणीच्या घटना घडत आहेत. तसेच खुनाच्या घटना देखील होत आहे. अर्थात एका गुन्ह्याचा तपास पूर्ण होत नाही; तोच दुसरा गुन्हा घडत असल्याचे मागील काही महिन्यांपासून सातत्याने घडत आहे.