'कपडे फाडले, नको तिथे स्पर्श करत सामूहिक बलात्काराचा प्रयत्न', कॉलेजच्या विद्यार्थिनीसोबत घडलं भयंकर

दिल्लीत गुन्हेगारी घटनांमध्ये वाढ होत असल्याचं चित्र आहे. अशातच दिल्लीतील साऊथ एशियन युनिव्हर्सिटीमधून संतापजनक प्रकार समोर आला आहे. एका विद्यार्थिनीने चार जणांनी मिळून सामुहिक बलात्कार करण्याचा प्रयत्न केला असल्याचा आरोप केला आहे. विद्यार्थिनीच्या तक्रारीवरून पोलिसांनी एफआयआर नोंदवला आहे. याप्रकरणी सध्या पोलिसांकडून अधिक तपास सुरू आहे. या घटनेनंतर दिल्ली पुन्हा हादरली आहे.

पोलिसांकडे दाखल केलेल्या तक्रारीत विद्यार्थिनीने म्हटले की, 'अत्याचार करणारे आरोपी हे ४ पुरूष होते. चारही आरोपींनी कपडे फाडले. नको तिथे स्पर्श केला. नंतर सामूहिक बलात्काराचा प्रयत्न केला'. ज्या विद्यापीठात हा गुन्हा घडला, त्या विद्यापीठात बांधकाम सुरू होते. या घटनेनंतर विद्यार्थिनीने पीसीआर कॉलद्वारे पोलिसांना घटनेची माहिती दिली. सोमवारी दुपारी ३ वाजण्याच्या सुमारास, पीडित तरूणीनं तक्रारीत संपूर्ण घटना सांगितली.

पोलिसांनी सांगितले की, एफआयआर नोंदवण्यात आला आहे. सर्व बाजूने या प्रकरणाचा तपास सुरू आहे. चौकशी सुरू आहे. पीडितेचे सध्या समुपदेशन सुरू आहे. या घटनेमुळे विद्यापीठ कॅम्पसमध्ये मुलींच्या सुरक्षिततेबाबत गंभीर प्रश्न उपस्थितीत झाला आहे.

पोलीस सुत्रांनी दिलेल्या माहितीनुसार, 'विद्यापीठातील जवळजवळ प्रत्येक ठिकाणी सीसीटीव्ही कॅमेरे बसवले आहेत. विद्यार्थिनीच्या जबाबाच्या आधारे सर्व ठिकाणांवरील सीसीटीव्ही फुटेज तपासले जात आहे. लवकरच या प्रकरणाचा उलगडा होईल'.