योगेश काशीद 
बीड : बीड शहरात सराईत गुन्हेगारांचा एक कारनामा समोर आला आहे. विशेष म्हणजे जिल्ह्यात मनाई आदेश लागू असताना जिल्हाधिकाऱ्यांच्या आदेशाचे उल्लंघन करत सराईत गुन्हेगाराची हायकोर्टातून जामिनावर सुटका झाल्यानंतर फटाक्यांची आतिषबाजी करत जल्लोषात स्वागत करण्यात आल्याचा प्रकार समोर आला आहे. याचा व्हिडीओ देखील सोशल मीडियावर व्हायरल झाला आहे. 

बीड शहरातील सराईत गुन्हेगार शेख नवीद शेख चॉंद या गुंडावर बीड पोलिसांनी MPDA अंतर्गत ३ जुन २०२५ रोजी कारवाई केली होती. त्याच्यावर पेठ बीड पोलीस ठाण्यात अनेक गुन्हे दाखल आहेत. या कारवाईनंतर हायकोर्टात त्याने जमीन अर्ज केला होता. दरम्यान दोन दिवसांपूर्वी शेख नवीद याला हायकोर्टाकडून जामीन मंजूर झाला. यानंतर तो जामिनावर बाहेर आला होता. 

दरम्यान शेख बाहेर आल्यानंतर काल सायंकाळी ५ वाजता बीड शहरातील मोमीनपुरा भागात फटाक्यांची आतिषबाजी करत त्याचे जंगी स्वागत करण्यात आले. यावेळी लहान मुलांच्या हातांमध्ये स्प्रे देऊन ते उडवायला लावले. तर काहींना रंग उधळायला लावला. अशा पद्धतीने एका गुंडाचे भर रस्त्यावर मोठ्या थाटात स्वागत केलं जात होतं. यावेळी रस्त्यावर वाहतूकीला अडथळा देखील निर्माण झाला होता. 

जिल्हाधिकाऱ्यांच्या आदेशाचे उल्लंघन 

याच दरम्यान जात असलेल्या एका ॲम्बुलन्सला देखील तेथून बाहेर पडण्यासाठी बराच वेळ लागला. दरम्यान बीडच्या जिल्हाधिकाऱ्यांनी मनाई आदेश लागू केले आहेत. त्याचेही उल्लंघन या गुंडाने केलं. या संपूर्ण प्रकरणाचा व्हिडिओ सध्या सोशल मीडियावर व्हायरल होत आहे. याप्रकरणी आम्ही सदरील गुंडावर आणि लोकांवर कारवाई करणार असल्याचे पेठ बीड पोलीस ठाणे प्रमुख अशोक मुदीराज यांनी फोनवरून बोलताना सांगितलं आहे.