योगेश काशिद, साम टीव्ही, प्रतिनिधी

Beed youth Shivam Chikne dies after love affair assault : हत्येच्या घटनेने बीड जिल्हा पुन्हा एकदा हादरला आहे. प्रेम प्रकरणातून इंजीनियरिंगचे शिक्षण घेणाऱ्या २१ वर्षीय तरूणाला पाच जणांनी बेदम मारहाण केली. यामध्ये त्याचा मृत्यू झाला आहे. मृत्यू झालेल्या २१ वर्षीय तरूणाचे नाव शिवम चिकणे असं आहे. १८ जुलै रोजी शिवम चिकणे याला रस्त्यात आडवून पाच जणांनी बेदम मारहाण केली होती. शिवम याला गंभीर अवस्थेत उपचारासाठी रूग्णालयात दाखल करण्यात आले होते, पण उपचारावेळी त्याचा मृत्यू झाला. पोलिसांनी याप्रकरणी गुन्हा दाखल केला असून तपास करण्यात येत आहे.

बीडच्या गेवराई तालुक्यातील गंगावाडी येथील २१ वर्षीय शिवम चिकणे या तरुणाला प्रेमसंबंधाच्या कारणावरून पाच जणांनी बेदम मारहाण केली होती. ही घटना १८ जुलै रोजी दुपारी २ वाजण्याच्या सुमारास गंगावाडी ते तळवाडा रस्त्यावर घडली. या हल्ल्यात गंभीर जखमी झालेल्या शिवम याच्यावर संभाजीनगरमध्ये एका रुग्णालयात उपचार सुरू होते. शनिवारी दुपारी त्याचा मृत्यू झाला. या प्रकरणात तलवाडा पोलिस ठाण्यात आधी जिवे मारण्याच्या प्रयत्नाचा गुन्हा दाखल झाला होता. आता यात खुनाचे कलम वाढविले जाणार आहे.

शिवमचे वडील काशीनाम चिकणे यांच्या तक्रारीनुसार, मुलगा शिवम हा माजलगाव येथे अभियांत्रिकीचे शिक्षण घेत होता. शिवमचे गावातीलच एका मुलीसोबत प्रेमसंबंध होते. १५ जुलै रोजी प्रेयसी एकटी असताना तिने शिवमला घरी बोलावले होते. त्यावेळी तिचे दोन नातेवाईक शिवम गणेश यादव आणि सत्यम मांगले हे तिथे आले व त्यांच्यात किरकोळ वाद झाला होता. गावकऱ्यांनी तो सोडवलाही होता. १८ जुलै रोजी दुपारी १२:३० वाजता काशीनाम चिकणे शेतात असताना त्यांना मुलाला मारहाण झाल्याची माहिती मिळाली. ते तत्काळ गेवराई येथील खासगी रुग्णालयात पोहोचले असता, शिवम बेशुद्धावस्थेत आढळला. ज्ञानदेव चिकणे यांनी दिलेल्या माहितीनुसार, दुपारी २ वाजता शिवम दुचाकीवरून जात असताना, शिवम गणेश यादव याने त्याची गाडी अडवून शिवीगाळ केली. त्यावेळी गणेश सुखदेव यादव, राजाभाऊ उत्तम यादव आणि ईश्वर गोवर्धन यादव हेही तिथे आले. शिवम यादव, सत्यम मांगले आणि राजाभाऊ यादव यांनी लाठ्या-काठ्यांनी, तर गणेश सुखदेव यादव आणि ईश्वर गोवर्धन यादव यांनी हाता-बुक्क्यांनी मारहाण केली होती. जखमी शिवमवर रुग्णालयात उपचार सुरू होते, परंतु शनिवारी दुपारी त्याचा मृत्यू झाला.

मुलीच्या वडिलाला तलवाडा पोलिसांनी अटक केली आहे, तसेच घटनास्थळी वरिष्ठ अधिकाऱ्यांनी भेट देऊन पंचनामाही केला. या प्रकरणात अगोदरच जिवे मारण्याचा प्रयत्न केल्याच्या कलमांखाली गुन्हा नोंद आहे. मुलाचा उपचारादरम्यान मृत्यू झाल्याने आता यात खुनाचे कलम वाढवणार असल्याचे उपनिरीक्षक स्वप्निल कोळी यांनी सांगितले.