• बारामतीमध्ये भीषण अपघातात दोघांचा मृत्यू

• निरा-मोरगाव राज्य मार्गावर घडली घटना

• भरधाव टेम्पोची दुचाकीचा धडक

• अपघातात एक मुलगा गंभीर जखमी झाला

मंगेश कचरे, बारामती

बारामतीमध्ये भीषण अपघातामध्ये दोन मुलींचा दुर्दैवी मृत्यू झाला. निरा - मोरगाव राज्य मार्गावर हा भीषण अपघात झाला. भरधाव टेम्पोने दुचाकीला धडक दिली. दुचाकीवरून जाणारे तिघे जण रस्त्यावर पडले. ट्रकच्या चाकाखाली चिरडून दोन मुलींचा जागीच मृत्यू झाला. या अपघातामध्ये दुचाकीचा चक्काचूर झाला. अपघातामध्ये लहान मुलगा गंभीर जखमी झाला आहे. या घटनेनंतर पोलिसांनी घटनास्थळी धाव घेत तपास सुरू केला. अपघातानंतर राज्य महामार्गावर वाहतूक कोंडी झाली होती.

मिळालेल्या माहितीनुसार, शनिवारी सायंकाळी ५ वाजताच्या सुमारास हा अपघात झाला. निरा -मोरगाव राज्य मार्गावर टेम्पो आणि दुचाकी यांच्यात गुळूंचेपासून दोन किलोमीटर अंतरावर हा अपघात झाला. तिघे जण दुचाकीवरून सोमेश्वर देवस्थानकडे जात होते. त्याचवेळी टेम्पोने दुचाकीला धडक दिली. अपघात इतका भीषण होता की दुचाकीचा पूर्णपणे चक्काचूर झाला. टेम्पोने दुचाकीला १५० फूट फरपटत नेले. या अपघातामध्ये दुचाकीवरील तिघे गंभीर जखमी झाले. जास्त रक्तस्राव झाल्यामुळे दोन मुलींचा जागीच मृत्यू झाला. तर मुलगा गंभीर जखमी झाला.

अपघातानंतर जखमी झालेल्या एका लहान मुलाला ग्रामस्थांनी तातडीने उपचारासाठी रुग्णालयात दाखल केले. अपघात झाल्यानंतर टेम्पो चालक वाहनासह पळून जाण्याचा प्रयत्न करीत होता. मात्र, सतर्क ग्रामस्थांनी त्याचा पाठलाग करून त्याला पकडले आणि पोलिसांच्या स्वाधीन केले. मृत तरुणींची ओळख अद्याप पटलेली नाही. त्याच ठिकाणी गेल्या अनेक वर्षापासून ग्रामस्थांची स्पीड ब्रेकरची मागणी आहे.

गेल्या काही वर्षात चार ते पाच अपघात होऊन या ठिकाणी काही जण जायबंदी झाले आहेत. तर काहींना अपंगत्व आले आहे. घटनेची माहिती मिळताच पोलिसांनी घटनास्थळी धाव घेत पंचनामा केला. दोघींचे मृतदेह ताब्यात घेत पोलिसांनी शवविच्छेदनासाठी रुग्णालयात पाठवले. तर जखमी मुलावर सध्या रुग्णालयात उपचार सुरू आहेत. या प्रकरणाचा पुढील तपास पोलीस निरीक्षक नागनाथ पाटील यांच्या मार्गदर्शनाखाली सुरू आहे.