Accident: भरधाव डंपरची रिक्षाला धडक, ५ जणांचा जागीच मृत्यू

• उत्तर प्रदेशमध्ये भीषण रस्ते अपघातामध्ये ५ जणांचा मृत्यू

• बांदा येथे डंपरने रिक्षाला धडक दिली

• ई-रिक्षावर डंपर उलटल्याने भीषण दुर्घटना

• या अपघातामध्ये ४ जण जखमी झालेत

उत्तर प्रदेशमध्ये भीषण रस्ते अपघाताची घटना घडली. भरधाव डंपरने अनेकांना चिरडलं. या अपघातामध्ये ५ जणांचा दुर्दैवी मृत्यू झाला तर अनेक जण गंभीर जखमी झाले आहेत. उत्तर प्रदेशच्या बांधा येथे ही घटना घडली. या अपघातानंतर घटनास्थळावर एकच गोंधळ उडाला. संतप्त झालेल्या नागरिकांनी रास्तारोको केला. या अपघातामध्ये जखमी झालेल्या नागरिकांना उपचारासाठी रुग्णालयात दाखल केले. सध्या पोलिस या अपघाताचा तपास करत आहेत.

मिळालेल्या माहितीनुसार, बुधवारी सायंकाळी ६ वाजताच्या सुमारास ही घटना घडली. बिसांडा शहरातील कालव्याजवळ खडी घेऊन जाणाऱ्या भरधाव डंपरने सायकलवरून जाणाऱ्या सेवानिवृत्त शिक्षकाला धडक दिली. या अपघातामध्ये त्यांचा जागीच मृत्यू झाला. त्यामुळे गावकऱ्यांनी त्या डंपरचा पाठलाग करण्याचा प्रयत्न केला. यावेळी चालकाने डंपरचा वेग वाढवला आणि समोरून येणाऱ्या ई-रिक्षाला जोरदार धडक दिली आणि ई- रिक्षावर उलटला.

या ई-रिक्षातून प्रवास करणारे ९ जण गंभीर जखमी झाले. यामधील ४ जणांचा जागीच मृत्यू झाला. मृतांमध्ये एका लहान मुलाचा समावेश आहे. ही घटना बिसंडा कस्बेमध्ये घडली. अपघातामध्ये जखमी झालेल्या ५ जणांना उपचारासाठी रुग्णालयात दाखल करणायत आले आहे. या अपघातानंतर डंपर चालक फरार झाला. संतप्त झालेल्या स्थानिक नागरिकांनी रास्तोरोको आंदोलन करत डंपर चालकाविरोधात कारवाई करण्याची मागणी केली.

पोलिसांनी सांगितले की, बिसांडा येथील घुरी गावातील ६१ वर्षीय निवृत्त शिक्षक रामेश्वर हे बीआरसीमधून आपल्या सायकलने घरी जात होते. लाउली टिकामू रस्त्यावरील कालव्याजवळ खुरहंदकडून येणाऱ्या खडीने भरलेल्या भरधाव डंपरने त्यांना चिरडले. अपघातामध्ये त्यांचा जागीच मृत्यू झाला. या घटनेनंतर चालकाने डंपरसह पळून जाण्याचा प्रयत्न केला. त्यामुळे गावकऱ्यांनी बाईकवरून त्याचा पाठलाग सुरू केला. चालकाने वेग वाढवला आणि ५०० मीटर पुढे जाऊन समोरून येणाऱ्या एका ई-रिक्षाला धडक दिली आणि त्यावर उलटला.

या अपघातामध्ये ई-रिक्षातून प्रवास करत असलेले कोर्राही गावातील रहिवासी ई-रिक्षा चालक नवीन, त्याचा शेजारी शाहबाज, राकेश आणि सोहनलाल यांचा मृत्यू झाला. शहबाजची आई शबाना, त्याची ३ महिन्यांची बहीण सफिया, सोहनलालची मुलगी शिवकली आणि बायको बउरी गंभीर जखमी झाले आहेत. जखमींना सीएचसी अटारा येथे उपचारासाठी पाठवण्यात आले आहे.