बारामती : ऊसतोड मजूर कामानिमित्ताने एका ठिकाणाहून दुसऱ्या ठिकाणी जात असतात. मात्र ऊसतोडणी निमित्ताने इंदापूर तालुक्यात गेलेल्या मजुरांबाबत धक्कादायक बाब समोर आली आहे. तालुक्यातील रेडा गावात ऊस तोडणीसाठी नेण्यात आलेल्या मजुरांना नजरकैदेत ठेवून त्यांच्यावर अत्याचार करण्यात आल्याची गंभीर तक्रार नोंदवण्यात आली आहे. यात ४१ मजुरांची सुटका करण्यात आली आहे. 

इंदापूर तालुक्यातील ऊस तोडणीला आलेलय कामगारांना वेटीस धरून ठेवण्यात आले होते. हे सर्व कामगार संभाजीनगर जिल्ह्यातील कन्नड तालुक्यातील होते. लहान आणि मोठ्यांची संख्या एकूण ४१ होती. रघुनाथ धनाजी सोनवणे या मुकादमाने मजुरांना ऊस तोडणीसाठी पैसे देतो असे सांगून रेडा गावात पाठवले. मात्र, मजुरांचे पैसे न दिल्याने ते अडकून पडले. 

तिघांविरोधात गुन्हा दाखल 

संजय पांडुरंग देवकर आणि विकास पांडुरंग देवकर यांनी त्यांना नजरकैदेत ठेवले. मजुरांना कुठेही जाऊ दिले जात नव्हते. इतकेच नाही तर या मजुरांच्या हालचालींवर सतत लक्ष ठेवले जात होते. या प्रकरणी संभाजीनगर जिल्ह्यातील नेवपूर येथील विष्णु नारायण गायकवाड यांनी सदर प्रकाराबाबत इंदापूर पोलिसांत तक्रार दाखल केली आहे. या तक्रारीनुसार रघुनाथ धनाजी सोनवणे, संजय पांडुरंग देवकर आणि विकास पांडुरंग देवकर यांच्या विरोधात विविध कलमान्वये गुन्हा दाखल करण्यात आला आहे.

४१ मजुरांची सुटका 

दरम्यान सदर प्रकाराबाबत जनसास फाउंडेशन नावाची संस्थेमध्ये एक केस रजिस्टर झाली. त्या केसच्या बेसिसवर संभाजीनगर येथील  जनसासच्या प्रतिनिधीकडून इंदापूरमध्ये कारवाई केली. या कारवाईमध्ये नजरकैदेत ठेवलेल्या ४१ ऊसतोड मजुरांची सुटका करण्यात आली आहे. यामुळे मजुरांनी सुटकेचा निश्वास सोडला आहे.