सुशील थोरात, साम टीव्ही

अहिल्यानगरच्या जामखेडमध्ये पैलवान सागर मोहोळकरवर गोळीबार झाल्याची घटना घडली होती. गुंड मोहोळकर याच्यावर पुण्यातील ससून रुग्णालयात उपचार सुरू आहेत. मोहोळकर याच्यावर गोळीबार झाल्यानंतर सर्वत्र एकच खळबळ उडाली. या प्रकरणात पोलिसांनी एकाला पुण्यातून एकाला ताब्यात घेतलं आहे. आरोपी पुण्याचा रहिवासी असून पोलिसांकडून गुंड निलेश घायवळ कनेक्शनचाही तपास होणार असल्याचे सांगण्यात आलं आहे.

पैलवान सागर मोहोळकरवर फायरिंग करणाऱ्या आरोपीला स्थानिक गुन्हे शाखेने ताब्यात घेतलं आहे. पोलिसांनी ताब्यात घेतलेला आरोपी पुण्याचा आहे. त्याची कसून चौकशी सुरू असल्याचे सांगण्यात आलं आहे.

मोहोळकर चर्चेत का आला?

नगरच्या जामखेड शहरात पैलवान सागर मोहोळकर याच्यावर गोळीबार करण्यात आला होता. या घटनेनंतर पोलिसांनी जमखमीला उपचारासाठी पुणे येथील ससून रुग्णालयात दाखल केले होते, या घटनेचा तपास सुरू केला होता. सागर मोहळकर याने कुख्यात गुंड निलेश घायवळ याच्या कानाखाली मारल्याची घटना धाराशिव जिल्ह्यातील भूम तालुक्यात एका जत्रेदरम्यान घडली होती. तेव्हा पासून सागर मोहोळकर हा चांगलाच चर्चेत आला होता. तसेच त्याच्यावर अनेक गंभीर गुन्हे दाखल असून त्यानुसार नगरच्या स्थानिक गुन्हे शाखेने तपास सुरू केला होता.

या घटनेचे धागेदोरे पुण्यापर्यंत जाऊन पोहोचले असून अहिल्यानगरच्या स्थानिक गुन्हे शाखेने जामखेड येथील अभिमन्यू होते, या ताब्यात घेऊन अधिक माहिती घेऊन यामध्ये गोळीबार करणाऱ्या पुणे येथील चार्ली उर्फ माऊली उर्फ ज्ञानेश्वर साठे, रोहित विठ्ठल आखाडे, चिन्या पूर्ण नाव माहित नाही, या आरोपींनी गोळीबार केल्याची माहिती घेतली असून यामध्ये दोन आरोपींना पोलिसांनी ताब्यात घेतले आहे.तसेच या आरोपींकडून गावठी कट्टा आणि एक जिवंत काडतुस जप्त केले आहे. या गोळीबारामागे गुंड निलेश घायवळ याचे काही कनेक्शन आहे का याबाबत आता पोलीस तपास करत आहे.