नांदेड: तब्बल ५५ दिवसानंतर नांदेडचे प्रसिद्ध बिल्डर संजय बियाणी यांच्या हत्येतील सहा आरोपींना अटक करण्यात नांदेड पोलिसांना यश आले आहे. या हत्येमागे पाकिस्तानात असलेला खलिस्तानी दहशतवादी हरविंदर सिंग रिंदा याचा हात आहे. पंजाब, दिल्ली, हरियाणा, उत्तर प्रदेश, तेलंगणा, आणि कर्नाटक या सहा राज्यात आरोपींचा शोध घेण्यात आला, अशी माहिती नांदेड परिक्षेत्राचे विशेष पोलिस (Police) महानिरीक्षक निसार तांबोळी यांनी आज दिली. (Biyani Murder Case)

पकडण्यात आलेले इंदरपालसिंग उर्फे सनी मेजर, मुक्तेश्वर उर्फ गोलू मंगनाळे, सतनामसिंग उर्फ सत्ता शेरगिल, हरदिपसिंग उर्फ सोनू बाजवा, गुरुमुखसिंग गिल, करणजितसिंघ साहू अशी आरोपींचे नावे आहेत. सर्व आरोपी हे मुळचे नांदेडचे असल्याची माहितीही तांबोळी यांनी दिली.

या प्रकरणात आणखी आरोपींचा सहभाग आहे. तसेच बियाणींवर गोळीबार करणारे अद्याप पोलिसांच्या हाती लागलेले नाहीत. खंडणीसाठीच बियाणींची हत्या झाल्याचा पोलिसांचा निष्कर्ष आहे. दरम्यान सहाही आरोपींना न्यायालयाने दहा दिवसांची पोलीस कोठडी सुनावली आहे. आरोपींच्या शोधात पोलीस (Police) अधिक्षक प्रमोदकुमार शेवाळे, एसआयटी प्रमुख तथा अतिरिक्त पोलीस अधीक्षक विजय कबाडे यांच्यासह ६० जणांच्या टीमने ही महत्वपूर्ण कामगिरी बजावली आहे.( Biyani Murder Case)