चीनमधील शास्त्रज्ञांनी असा दावा केला आहे की, जगातील पहिला मानवरूपी (ह्यूमनॉइड) रोबोट लवकरच बाळाला जन्म देऊ शकणार आहे. ग्वांगझौ मधील कायवा टेक्नॉलॉजीचे डॉ. झांग किफेंग यांच्या नेतृत्वाखाली हे प्रोजेक्ट सुरू आहे. या प्रोजेक्टचा उद्देश कृत्रिम गर्भाशयाच्या मदतीने गर्भधारणेची प्रक्रिया रोबोटमध्ये घडवून आणणं हा आहे.

कृत्रिम गर्भाशयातील बाळ

या तंत्रज्ञानानुसार बाळ रोबोटच्या शरीरातील कृत्रिम गर्भाशयासारख्या जागेत वाढणार आहे. या गर्भाशयात कृत्रिम अम्निओटिक फ्लुइड (गर्भजलासारखा द्रव) असेल. बाळ नऊ महिने या जागेत वाढेल आणि त्याला नाळेसारख्या ट्यूबमधून पोषण मिळेल. त्यानंतर नैसर्गिक पद्धतीने प्रसूती होणार आहे.

कायदेशीर नियमनाची तयारी

डॉ. झांग यांनी आधीच ग्वांगडोंग प्रशासनाशी चर्चा सुरू केली आहे. जेणेकरून या तंत्रज्ञानासाठी कायदे आणि नियम तयार करता येतील. त्यांच्या म्हणण्यानुसार, तंत्रज्ञान आता mature stage मध्ये पोहोचली आहे. फक्त ते रोबोटच्या पोटात बसवायचं आहे, ज्यामुळे खऱ्या व्यक्ती आणि रोबोट यांच्यात परस्पर संवाद साधता येणार आहे आणि गर्भधारणा शक्य होणार आहे.

बाजारात उपलब्ध होण्याची शक्यता

अहवालानुसार, या प्रोजेक्टचा पहिला नमुना पुढच्या वर्षी बाजारात विक्रीसाठी उपलब्ध होऊ शकतो. त्याची किंमत सुमारे १ लाख युआन (१२ लाख रुपये पेक्षा अधिक) असू शकते. हा ह्यूमनॉइड रोबोट गर्भधारणा ते प्रसूतीपर्यंतचा संपूर्ण प्रवास दाखवू शकेल, असे सांगण्यात येत आहे.

तांत्रिक अनिश्चितता

अद्याप नेमकी फलन प्रक्रिया (फर्टिलायझेशन) कशी होईल याची स्पष्टता नाही. भ्रूण रोबोटच्या कृत्रिम गर्भाशयात कसा बसवला जाईल, हे शास्त्रज्ञांनी स्पष्ट केलेलं नाही. मात्र, काही संशोधक म्हणतात की, ही संकल्पना पूर्वीच्या त्या प्रयोगांवर आधारित आहे.

कायदेशीर व नैतिक वाद

या नवीन कल्पनेमुळे मोठा कायदेशीर आणि नैतिक वाद निर्माण झाला आहे. समर्थकांचं म्हणणं आहे की, हा शोध भविष्यात वैद्यकीय क्षेत्र आणि कौटुंबिक जीवनात आमूलाग्र बदल घडवू शकतो. तर विरोधकांचं मत आहे की यामुळे समाजात नैतिकतेचे मोठे प्रश्न उभे राहतील.

चीनमधील वाढती वंध्यत्व समस्या

चीनमध्ये वंध्यत्वाचे प्रमाण झपाट्याने वाढताना दिसतेय. २००७ मध्ये हे प्रमाण ११.९% इतके होते, तर २०२० मध्ये ते वाढून १८% झाले. या पार्श्वभूमीवर या नव्या कल्पनेकडे एक मोठ्या उपाययोजनेच्या रूपात पाहिले जात आहे.

डिस्क्लेमर : वरील माहिती आम्ही फक्त वाचक-प्रेक्षकांना देत आहोत. आम्ही याचं समर्थन अथवा दावा करत नाही. कोणतेही उपचार, डाएट आणि औषधं तज्ज्ञांच्या सल्ल्यानंच घ्यावीत.