Liver cirrhosis last stage: लिव्हर सिरोसिसच्या लास्ट स्टेजमध्ये शरीरात होतात 'हे' मोठे बदल; यकृत सडण्याची लक्षणं वेळीच ओळखा

आपल्या शरीरातील लिव्हर हा एक अत्यंत महत्त्वाचा अवयव आहे. लिव्हरच्या माध्यमातून पचनक्रिया, विषारी घटकांची शुद्धी, आणि ऊर्जा निर्मिती ही कार्य केली जातात. मात्र सध्या अनेकांना फॅटी लिव्हरसारख्या समस्यांचा सामना करावा लागत आहे. ही स्थिती सुरुवातीला फारशी गंभीर वाटत नसली, तरी याकडे वेळेवर लक्ष दिलं नाही तर लिव्हर सिरोसिससारख्या गंभीर आजाराचा धोका वाढतो.

फॅटी लिव्हर म्हणजे काय?

फॅटी लिव्हर म्हणजे लिव्हरमध्ये चरबी जमा होणं. ही स्थिती सुरुवातीला कोणत्याही लक्षणांशिवाय दिसते. साध्या आहार आणि जीवनशैलीतील सुधारणा करून ती सहज बरी होऊ शकते. पण याकडे दुर्लक्ष केल्यास पुढे लिव्हर सिरोसिससारख्या अवस्थेपर्यंत पोहोचू शकते. या समस्येमध्ये लिव्हरवरच नुकसान झालेलं असतं.

लिव्हर सिरोसिस म्हणजे काय?

लिव्हर सिरोसिस ही एक दीर्घकालीन समस्या आहे. यामध्ये लिव्हरच्या हेल्दी पेशींवर सूज येते आणि हळूहळू त्या पेशी डॅमेज होतात. या समस्येमध्ये जसं नुकसान वाढत जातं, तसंतसं लिव्हर आपलं कार्य करणं थांबवतो. या अवस्थेला डी-कंपेन्सेटेड सिरोसिस असं म्हणतात. यावेळी लक्षणं तीव्रपणे दिसू लागतात.

लिव्हर सिरोसिसच्या शेवटच्या टप्प्यामध्ये कोणती लक्षणं दिसून येतात?

• त्वचा आणि डोळे पिवळसर होणं

• लघवीचा रंग गडद होणं

• फिकट रंगाचा मल

• डोळ्यांच्या पापण्या किंवा त्वचेवर पिवळसर वसा जमा होणं

• हात, पाय, पोट किंवा चेहऱ्यावर सूज येणं

• पोट फुगल्यासारखं वाटणं

लिव्हर सिरोसिसवर कशा पद्धतीने उपचार करू शकतो?

लिव्हर सिरोसिस एकदा झाल्यानंतर ती रिव्हर्स होत नाही. त्यामुळे डॉक्टर यावर नियंत्रण ठेवण्यासाठी औषधं, विशिष्ट आहार आणि नियमित तपासण्यांचा सल्ला देतात. मुख्य म्हणजे लक्षणांवर नियंत्रण ठेवणं हे प्राथमिक उद्दिष्ट असतं. फायबरयुक्त आणि कमी चरबीयुक्त आहार, मीठाचं प्रमाण कमी करणं, दारू, सिगारेटपासून पूर्णतः दूर राहणं अत्यंत महत्त्वाचं आहे. अनेक प्रकरणांमध्ये अंतिम उपाय म्हणून लिव्हर ट्रान्सप्लांट करावं लागतं.

डिस्क्लेमर : वरील माहिती आम्ही फक्त वाचक-प्रेक्षकांना देत आहोत. आम्ही याचं समर्थन अथवा दावा करत नाही. कोणतेही उपचार, डाएट आणि औषधं तज्ज्ञांच्या सल्ल्यानंच घ्यावीत