वयाच्या ३५ शी नंतर महिलांची हाडं हळूहळू कमजोर होऊ लागतात. ही गोष्ट ऐकायला साधी वाटली तरी तज्ज्ञांच्या मते हा नैसर्गिक बदल आहे. वय वाढत गेल्यावर शरीरात होणारे हार्मोनल बदल आणि जीवनशैलीतील काही सवयी थेट हाडांच्या मजबुतीवर परिणाम करतात. जर वेळेत काळजी घेतली नाही, तर पुढे गंभीर त्रास उद्भवू शकतो.

अनेक महिला या समस्येकडे दुर्लक्ष करतात, पण ते टाळलं पाहिजे. तरुण वयातच हाडं मजबूत करणं गरजेचं आहे. अन्यथा पुढील काळात जास्त अडचणींना सामोरं जावं लागू शकतं.

हाडं कमजोर होण्यामागची कारणं

महिलांमध्ये ‘एस्ट्रोजन’ नावाच्या हार्मोनाची कमतरता ही प्रमुख कारणं मानली जाते. हे हार्मोन हाडं मजबूत ठेवण्यासाठी मदत करतं. पण ३५ वर्षांनंतर शरीरातील एस्ट्रोजनचं प्रमाण कमी होऊ लागतं. त्यामुळे कॅल्शियम कमी होऊन हाडांची ताकद घटते आणि फ्रॅक्चर होण्याचा धोका वाढतो.

कॅल्शियम आणि जीवनसत्त्व ‘डी’ आवश्यक

हाडं टिकवून ठेवण्यासाठी कॅल्शियम आणि व्हिटॅमिन ‘डी’ फार महत्वाचं आहे. यासाठी दूध, दही, पनीर, हिरव्या भाज्या यांचा आहारात समावेश करणं आवश्यक आहे. रोज किमान दहा मिनिटं उन्हात फिरणं. तसंच ‘फॉर्टिफाइड’ अन्नपदार्थ खाणं हे सुद्धा उपयुक्त ठरतं. या छोट्या सवयींमुळे हाडं मजबूत राहतात आणि ‘बोन डेन्सिटी’ चांगली टिकते.

हाडांच्या ताकदीचं खरं रहस्य

फक्त खाण्यापिण्यानेच हाडं मजबूत होत नाहीत. हलक्या-फुलक्या वजनाच्या व्यायामपद्धती जसं की brisk walking, योगाभ्यास किंवा resistance training हाडांना ताकद देतात. यामुळे स्नायूंमध्येही शक्ती वाढते आणि पडल्यामुळे होणाऱ्या फ्रॅक्चरचा धोका कमी होतो.

काही सवयी बदलाव्या लागतील

हाडं मजबूत ठेवण्यासाठी काही जीवनशैलीतील बदल करणंही महत्वाचं आहे. धूम्रपान आणि मद्यपान टाळणं गरजेचं आहे. संतुलित आणि पोषक आहार घेणं आवश्यक आहे. नियमित आरोग्य तपासण्या करून घेतल्यास हाडं कमजोर होण्याची प्रक्रिया वेळेत लक्षात येऊ शकते. अशा छोट्या-छोट्या सवयी भविष्यात मोठं संरक्षण देतात.

३५ वर्षांनंतर हाडं कमजोर होणं ही एक सामान्य समस्या आहे. मात्र योग्य आहार, रोजचा व्यायाम आणि जीवनशैलीतले काही छोटे बदल यामुळे महिलांची हाडं दीर्घकाळ मजबूत राहू शकतात. डॉक्टरांच्या सांगण्याप्रमाणे, जर वयाच्या सुरुवातीच्या टप्प्यापासून याकडे लक्ष दिलं, तर पुढच्या आयुष्यात मोठे त्रास टाळता येऊ शकतात.