High blood pressure: ही ५ लक्षणं दिसली तर समजा ब्लड प्रेशर वाढलंय; हार्ट अटॅकचा धोका टाळण्यासाठी लक्षणं ओळखा

हाय ब्लड प्रेशर, ज्याला आपण उच्च रक्तदाब म्हणतो हे सध्याच्या काळात जागतिक पातळीवर हृदयविकार आणि अकाली मृत्यूचा एक प्रमुख कारण आहे. या आजाराला 'साइलेंट किलर' असंही म्हटलं जातं कारण सुरुवातीला याची लक्षणं फारशी दिसून येत नाहीत. मात्र वेळेवर लक्ष दिलं नाही तर स्ट्रोक, हृदयविकार, किडनी निकामी होणं आणि अनेक गंभीर आजार उद्भवू शकतात.

अमेरिकेतील आकडेवारीनुसार, जवळपास अर्ध्या लोकांना हाय ब्लड प्रेशरचा त्रास आहे. मात्र त्यातले बरेच लोक त्याच्या धोक्याची जाणीव नसल्यामुळे उपचार घेतच नाहीत. त्यामुळे काही विशेष लक्षणांकडे दुर्लक्ष न करता त्याची वेळीच नोंद घेणं गरजेचं आहे.

सतत डोकेदुखी

कधीकधी कोणताही ठोस कारण नसताना वारंवार होणारी डोकेदुखी ही उच्च रक्तदाबाचं लक्षण असू शकतं. विशेषतः सकाळी उठल्यावर डोकं ठणकणं, जोरात ठोकल्यासारखं वाटणं, औषध घेऊनही काही फरक न पडणं अशा प्रकारच्या डोकेदुखीकडे दुर्लक्ष करू नये. मेंदूतील रक्तवाहिन्यांवर ताण आल्यामुळे असं होऊ शकतं.

चक्कर येणं

वारंवार चक्कर येणं किंवा डोळ्यांपुढे अंधारी येणं हे शरीरातील रक्तप्रवाह व्यवस्थित न चालल्याचं लक्षण असू शकतं. उच्च रक्तदाबामुळे शरीराच्या विविध अवयवांमध्ये ऑक्सिजन योग्य प्रमाणात पोहोचत नाही आणि त्यामुळे अशक्तपणा किंवा अचानक भोवळ येऊ शकते.

दृष्टीमध्ये बदल

धुसर दिसणं, डबल दिसणं किंवा अचानक दृष्टिहीनता येणं ही लक्षणं ‘हायपरटेन्सिव्ह रेटिनोपॅथी’ची असू शकतात. या स्थितीत डोळ्यांच्या रक्तवाहिन्यांना नुकसान होतं. वेळेवर लक्ष दिलं नाही तर कायमस्वरूपी दृष्टीदोष निर्माण होऊ शकतो. त्यामुळे डोळ्यांच्या दृष्टीमध्ये जर काही अडचण जाणवली तर तातडीने तज्ज्ञ डॉक्टरांचा सल्ला घ्या.

श्वास घेण्यास त्रास होणं

काही लोकांना वय किंवा वजन न वाढवता देखील थोडसं काम केल्यावर दम लागतो. हे लक्षणसुद्धा हाय ब्लड प्रेशरचं असू शकतं. हृदयावर जास्त ताण पडल्यामुळे फुफ्फुसांमध्ये पाणी साचण्याची शक्यता वाढते आणि त्यामुळे श्वास घ्यायला अडचण होते.

छातीत वेदना

छातीत जडपणा वाटणं, दुखणं किंवा हालचाली करताना अस्वस्थ वाटणं ही देखील एक गंभीर सूचना असते. उच्च रक्तदाबामुळे हृदयावर ताण येतो आणि त्यामुळे अँजिना किंवा हृदयविकाराचा झटका येण्याचा धोका वाढतो. जर छातीत वेदना होत असतील आणि त्यासोबत घाम येणं, मळमळणं किंवा डाव्या हातात वेदना जाणवणं असेल तर तात्काळ वैद्यकीय मदत घ्या.

काय करावं?

वरील लक्षणांपैकी एक किंवा अधिक लक्षणं सतत जाणवत असतील तर ताबडतोब डॉक्टरांकडे जाऊन रक्तदाब तपासून घ्या. कारण वेळेवर निदान झाल्यास योग्य उपचारांमुळे धोका टाळता येतो.

डिस्क्लेमर : वरील माहिती आम्ही फक्त वाचक-प्रेक्षकांना देत आहोत. आम्ही याचं समर्थन अथवा दावा करत नाही. कोणतेही उपचार, डाएट आणि औषधं तज्ज्ञांच्या सल्ल्यानंच घ्यावीत