हिंदू धर्मात भाऊबीज हा सण खूप महत्त्वाचा मानला जातो. दरवर्षी कार्तिक महिन्यातील शुक्ल पक्षाच्या द्वितीया तिथीला हा सण साजरा केला जातो. याला भ्रातृ द्वितीया असंही म्हटलं जातं. भाऊबीज हा सण भावंडांमधील प्रेम, विश्वास आणि आपुलकं प्रतीक असतो. या दिवशी बहिणी आपल्या भावाला तिलक करून त्याच्या दीर्घायुष्यासाठी, सुख समृद्धीसाठी आणि आनंदासाठी प्रार्थना करतात.

या सणाला भाऊ देखील बहिणीला भेटवस्तू देतो आणि तिचं रक्षण करण्याचं वचन देतो. यंदा भाऊबीज गुरुवार २३ ऑक्टोबर २०२५ रोजी साजरी केली जाणार आहे. ही तिथी यम द्वितीया म्हणूनही ओळखली जाते.

भाऊबीज २०२५ चे शुभ मुहूर्त

पंचांगानुसार भाऊबीज कार्तिक शुक्ल द्वितीया तिथीला साजरी होते. यंदा ही तिथी बुधवार २२ ऑक्टोबर रोजी रात्री ८ वाजून १६ मिनिटांनी सुरू होणार आहे. गुरुवार २३ ऑक्टोबर रोजी रात्री १० वाजून ४६ मिनिटांनी संपणार आहे.

भावाला ओवाळण्याच्या शुभ वेळा

पहिला मुहूर्त दुपारी १ वाजून १३ मिनिटांपासून ते ३ वाजून २८ मिनिटांपर्यंत असणार आहे. तर दुसरा अभिजीत मुहूर्त सकाळी ११ वाजून ४३ मिनिटांपासून ते १२ वाजून २८ मिनिटांपर्यंत असेल तिसरा विजय मुहूर्त दुपारी १ वाजून ५८ मिनिटांपासून ते २ वाजून ४३ मिनिटांपर्यंत असेल चौथा गोधूळी मुहूर्त संध्याकाळी ५ वाजून ४३ मिनिटांपासून ते ६ वाजून ९ मिनिटांपर्यंत असणार आहे.

भाऊबीज २०२५ चे शुभ योग

या वर्षी भाऊबीजचा सण सर्वार्थ सिद्धी योग आणि रवि योगात साजरा होणार आहे. हे योग अतिशय शुभ मानले जातात.

पूजन विधी

भाऊबीजच्या दिवशी सकाळी स्नान करून स्वच्छ कपडे घालावेत. पूजेसाठी गणपती आणि चित्रगुप्त यांची पूजा करावी. त्यानंतर बहिणी भावाला ओवाळतात. भाऊही बहिणीला भेटवस्तू देतो आणि तिचं रक्षण करण्याचं वचन देतो. या दिवशी भावंडांमधील प्रेम आणि आशीर्वादाला विशेष महत्त्व असतं.

भाऊबीजेचं महत्त्व

या दिवशी भगवान चित्रगुप्ताची पूजा करण्याचा शास्त्रानुसार विधी आहे. भाऊबीज हा सण भावंडांच्या नात्याला अधिक घट्ट करतो. बहिणी या दिवशी भावाला ओवाळण्यापूर्वी काहीही खात नाहीत. या व्रताला भ्रातृ द्विज व्रत असं म्हणतात. पूर्ण तिथी उपवास करणं आवश्यक नसलं तरी ओवाळणी होईपर्यंत उपवास पाळणं शुभ मानलं जातं.