कोकण (Konkan) हे विविधतेने आणि संस्कृतीने नटलेले आहे. कोकणाचा समुद्रकिनारा पर्यटकांचे आकर्षण आहे. येथे दरवर्षी लाखो पर्यटक निसर्गाचा मनसोक्त आनंद घेण्यासाठी येतात. कोकणाला ऐतिहासिक पार्श्वभूमी देखील आहे. तसेच कोकणाला मोठे धार्मिक महत्त्व देखील लाभले आहे. कोकणात अनेक मंदिरे आहेत. जी खूप प्राख्यात आहेत.

सध्या सर्वत्र नवरात्रीचा उत्सव पाहायला मिळत आहे. सर्वजण देवीच्या भक्तीत तल्लीन झाले आहेत. कोकणात देखील नवरात्री मोठ्या उत्साहाने साजरी करतात. मुंबई असो वा कोकण नवरात्रीत देवीची मंदिरे दिव्यांनी उजळून निघतात.

कोकणातील मंदिरे ही वास्तुकलेचा उत्तम नमुना आहे. कोकणात कोसाळणारे धबधबे आणि मंद पाण्याच्या लाटा अनुभवता येणारा अथांग समुद्रकिनारा लाभला. कोकणात आध्यात्मिक वातावरण तुम्हाला अनुभवता येईल. कोकणातील शक्तिशाली मंदिरे तुम्हाला ऊर्जा देतील. तुम्ही जर नवरात्रीत कोकणात असाल किंवा सुट्टीत कोकणात जाण्याचा प्लान करत असाल तर कोकणातील या देवीच्या मंदिरांना आवर्जून भेट द्या. तेथील प्रसन्नता अनुभवून तुमचे मन शांत होईल.

श्री चंडिका देवी मंदिर

दापोलीतील दाभोळ गावात श्री चंडिका देवी मंदिर आहे. हे स्वयंभू मंदिर असल्याचे तिथेल लोक बोलतात. हे मंदिर गुहेत आहे. त्यामुळे मंदिरात प्रकाश नसतो. फक्त दिव्यांच्या प्रकाशात मंदिर उजळून निघते. येथील आजूबाजूचा परिसर निसर्गरम्य आहे. तुम्ही येथे तुमच्या कुटुंबासोबत दर्शनाला येऊ शकता. येथील देवीचे रूप पाहून डोळ्यांचे पारणे फिटेल.

दुर्गादेवी मंदिर

रत्नागिरी जिल्ह्यातील गुहागरमध्ये दुर्गादेवी मंदिर वसलेले आहे. हे प्राचीन मंदिर आहे. या मंदिराच्या चहूबाजूला हिरवळ पाहायला मिळते. येथे एक तलाव देखील पाहायला मिळते. दुर्गा देवी व्यतिरिक्त मंदिरात भगवान विष्णू, भगवान शंकर, लक्ष्मी देवी आणि भगवान गणेश यांची देखील मूर्ती तुम्हाला पाहायला मिळेल.

भगवती मंदिर

देवगड मधील कोटकामते गावात भगवती मंदिर आहे. हे खूप प्राचीन मंदिर आहे. या मंदिराच्या भिंतीवर शिलालेख पाहायला मिळतात. मंदिराच्या आजूबाजूचा परिसर आमराईने भरलेला आहे. भगवती मंदिर देवीची पाषाणाची रेखीव मूर्ती आहे. मंदिराच्या भिंतीवरचे कोरीव नक्षीकाम अप्रतिम आहे. या मंदिरात नवरात्रोत्सव मोठ्या जल्लोषात साजरा केला जातो.