आजकाल नाश्त्याला साऊथ इंडियन पदार्थ मोठ्या प्रमाणात खाल्ले जातात. ते बनवायला सोपे आणि खायला चविष्ट लागतात. पावसात अनेकांना गरमागरम आणि चटपटीत नाश्ता लागतो. अशा वेळी तुम्ही टोमॅटो डोसा बनवू शकता. हा डोसा कमी वेळात बनतो. तसेच यासाठी काही पूर्वतयारी देखील लागत नाही. कारण डोसा, इडली आणि वडा बनवण्यसाठी पीठ आंबवलेले लागते. पण हा टोमॅटो डोसा तुम्ही न न आंबवता देखील बनवू शकता. हा डोसा टोमॅटो प्युरी आणि उडीद डाळपासून तयार करतात. नाश्त्याला दोन टोमॅटो डोसे जरी खाल्ले तरी पोट दीर्घकाळ भरलेले राहते.

टोमॅटो डोसा

साहित्य

• तांदूळ

• उडीद डाळ

• टोमॅटो

• कोथिंबीर

• तेल

• तिखट-मीठ

• धणे -जिरे पावडर

• लाल मिरची

• मीठ

• पाणी

कृती

चटपटीत टोमॅटो डोसा बनवण्यासाठी सर्वप्रथम तांदूळ आणि उडीद डाळ पाण्यात भिजत ठेवा. त्यानंतर उडीद डाळ, तांदूळ आणि धणे एकत्र मिक्सरमध्ये वाटून घ्या. हे मिश्रण चवीनुसार मीठ १ तास बाजूला ठेवून द्या. आता दुसरीकडे चिरलेला टोमॅटो, लाल मिरची यांची पेस्ट तयार करून घ्या. एका मोठ्या भांड्यात उडीद डाळीचे मिश्रण आणि टोमॅटो-मिरची पेस्ट छान एकत्र करून घ्या. मंद आचेवर गॅस ठेवून त्यात थोडे तेल घाला. आता या पॅनवर डोसा गोल पसरवून घ्या आणि दोन्ही बाजूने छान शेकवा. तुम्ही हा डोसा नारळाच्या चटणीसोबत खाऊ शकता.